ბადაგონის ადვოკატის თქმით, ფინანსურმა პოლიციამ ის დოკუმენტები ამოიღო, რასაც საქმესთან კავშირი არ აქვს

კომპანია ბადაგონის ამჟამინდელი მენეჯმენტი ფინანსთა სამინისტროს საგამოძიებო სამსახურის განცხადებას ეხმაურება. კომპანიის ინტერესების დამცველები უწყებას კანონის უხეშ დარღვევაში ადანაშაულებენ.

ადვოკატ ზაზა ხატიაშვილის განცხადებით, საგამოძიებო მოქმედებები გამომძიებლებს უნდა ჩაეტარებინათ. მისივე განცხადებით ფინანსურმა პოლიციამ ცენტრალური ოფისიდან ის დოკუმენტები ამოიღო, რასაც კავშირი არ აქვს ამ საქმესთან.

კომპანიაში აცხადებენ, რომ სამართლებრივი დავა არა ფინანსურმა პოლიციამ, არამედ საქალაქო სასამართლომ უნდა გამოიძიოს.

8 თებერვლას კომპანია "ბადაგონის" ადვოკატმა ზაზა ხატიაშვილმა ეკონომიკის მინისტრი დიმიტრი ქუმსიშვილი კარგად დაგეგმილ პროვოკაციაში დაადანაშაულა და პრემიერმინისტრს საკითხის გარკვევას სთხოვა.

"ამ უბედურების უკან დგას დავით ბეჟუაშვილი, სააკაშვილის პორტირებული ხალხი და ასევე დღევანდელი ხელისუფლების წარმომადგენლები. ამასთან, არის ეკონომიკის მინისტრის და ვიცეპრემიერის დიმიტრი ქუმსიშვილის კარგად დაგეგმილი პროვოკაცია. მივმართავ პრემიერმინისტრს, მოიხადოს ამ ვანდალური ფაქტის გამო ბოდიში", - თქვა ზაზა ხატიაშვილმა კომპანია "ბადაგონის" სახელით.

კომპანია "ბადაგონის" ხელმძღვანელობის ბრალდებას გამოეხმაურა დიმიტრი ქუმსიშვილი, რომელმაც განმარტა, რომ  მის მიმართ გამოთქმული ბრალდებები აბსურდული და არასერიოზულია.

უსაფუძვლო ბრალდებებისთვის ბადაგონის მფლობელ გიორგი სალაყაის წინააღმდეგ სასამართლოში ჩივილს დავით ბეჟუაშვილი აპირებს, ამის შესახებ ბეჟუაშვილის ადვოკატმა ზვიად კორძაძემ განაცხადა.

კომპანია "ბადაგონის" საქმის გაკონტროლება პრემიერმინისტრის დავალებით ბიზნესომბუდსმენს დაევალა, რომელიც ბადაგონის დამფუძნებელს და საგამოძიებო სამსახურის უფროსს უკვე შეხვდა. 

7 თებერვალს, კომპანია ბადაგონში ფინანსთა სამინისტროს საგამოძიებო სამსახური შევიდა. უწყების ცნობით, გამოძიების დაწყებას საფუძვლად დაედო შპს ,,ბადაგონის“ ყოფილი მეწილის, კომპანია „გრაკორო თრეიდინგ ლიმიტედის“ წარმომადგენლის განცხადება. კერძოდ, გამოძიება შპს „ბადაგონის“ მიერ დიდი ოდენობით წილის მართლსაწინააღმდეგოდ მითვისების ფაქტზე დაიწყო. 

კომპანია ბადაგონის 100% წილის მფლობელი დღეს გიორგი სალაყაიაა, თუმცა წლების განმავლობაში ამ კომპანიაში წილს „გრაკორო თრეიდინგ ლიმითედი“ ფლობდა, რომელიც 2010 წლის თებერვალში ბადაგონის 100% წილის მფლობელად ირიცხებოდა. 2013 წელს მისი წილი კომპანიაში 60%-მდე შემცირდა, 2015-ში კი ჯერ 50%-მდე, - შემდეგ კი კომპანია სრულად გიორგი სალაყაიას მფლობელობაში გადავიდა. გიორგი სალაყაიას თქმით, კომპანიის წილზე პრეტენზია ვლადიმერ ჯანჯღავას აქვს, თუმცა მისივე თქმით, ჯანჯღავას კომპანიასთან შეხება უკვე 4 წელია აღარ აქვს.

კომპანია "გრაკორო ტრეიდინგ ლიმიტედის" და ვლადიმერ ჯანჯღავას ადვოკატი იმედა დვალიძე კი აცხადებს, რომ ვლადიმერ ჯანჯღავას სახელი "ბადაგონსა" და "გრაკორო ტრეიდინგ ლიმიტედს" სამართლებრივად არ უაკვშირდება, თუმცა, კომპანიის აქციონერები წლების განმავლობაში იყვნენ ჯანჯღავას მეუღლე და სიმამრი: ეკატერინე ეზუგბაია და გივი ეზუგბაია, რომლებმაც წლების განმავლობაში კომპანიისთვის 20 მილიონამდე დოლარი მოიზიდეს.

დვალიძის თქმით, რამდენიმე წლის წინ "ბადაგონის" ამჟამინდელი მესაკუთრე გიორგი სალაყაია და ჯანჯღავა ფორმალურად შეთანხმდნენ, რომ კომპანიის 100% დროებით სრულად გადავიდოდა გიორგი სალაყაიას საკუთრებაში, იმისთვის, რომ კომპანიის მართვა გაიოლებულიყო, რადგან ჯანჯღავა რუსეთში ცხოვრობს. ადვოკატის თქმით სალაყაიამ მეგობრობაზე და ნდობაზე დამყარებული ფორმალური შეთანხმება დაარღვია და ჯანჯღვას წილი მიითვისა. დვალიძე ამბობს, რომ ვლადიმერ ჯანჯღავას "ბადაგონის" წილის დაბრუნება სურს, რომელიც მართლსაწინააღმდეგოდ ჩამოართვეს და სალაყაიასთან უშედეგო მოლაპარაკებების შემდეგ გასული წლის დეკემბერში საქმე ფინანსთა სამინისტროს საგამოძიებო სამსახურში შეიტანეს.

სალაყაიას მხარე დავის სასამართლოში წარმართვას ემხრობა, "გრაკო თრეიდინგ ლიმიტედი" კი ამბობს, რომ წილების უკანონო მითვისება სამოქალაქო დავა არ არის და საგამოძიებო სამსახურს ამიტომ მიმართეს.

ვლადიმერ ჯანჯღავას ადვოკატი თავისი კლიენტის დავით ბეჟუაშვილთან და მთავრობის წარმომადგენლებთან რაიმე კავშირს უარყოფს.