ბადაგონი: დღეიდან კრიზისული მართვის რეჟიმზე გადავდივართ

"კომპანია „ბადაგონის“ თბილისის სათაო ოფისი საქმიანობას დროებით აჩერებს"- ამის შესახებ კომპანიის დამფუძნებელმა გიორგი სალაყაიამ განაცხადა.

მისი თქმით, დღეიდან კომპანია კრიზისული მართვის რეჟიმზე გადადის.

“უბინძურესი საინფორმაციო კამპანიის შედეგად, რომელიც უკანასკნელი რამდენიმე კვირის განმავლობაში მიმდინარეობდა პირადად ჩემი, ლიზა ბაგრატიონის და საერთოდ „ბადაგონის“ წინააღმდეგ, ჩვენ მივიღეთ ძალიან მძიმე შედეგები. მოგეხსენებათ, რომ ბიზნესი და განსაკუთრებით ექსპორტზე ორიენტირებული საწარმო დიდწილად დამოკიდებულია გარე ფაქტორებზე, როგორიც არის ქვეყანაში შექმნილი ბიზნესგარემო და ბრენდის ირგვლივ არსებული საინფორმაციო ფონი. სწორედ ამ ფაქტორების გამო, „ბადაგონმა“, უკანასკნელი ერთი კვირის განმავლობაში, დაკარგა უმსხვილესი კონტრაქტორი ორგანიზაცია, რომელიც აწარმოებდა „ბადაგონის“ ღვინის ექსპორტს ჩინეთში და ამასთან ერთად რუსეთის მთავარმა დისტრიბუტორმა უარი განაცხადა კონტრაქტით გათვალისწინებულ ვალდებულებებზე. სამწუხაროდ, შექმნილი ვითარებით სარგებლობენ არაკეთილსინდისიერი კონკურენტებიც. მოგახსენებთ, რომ ამ ყველაფრის შესახებ ვაცნობე პრემიერ-მინისტრს, გიორგი კვირიკაშვილს, რაზეც პრემიერმა აღუთქვა მხარდაჭერა „ბადაგონს“ და დამარწმუნა, რომ უშუალოდ ჩაერთვებოდა „ბადაგონის“ ირგვლივ შექმნილი ვითარების გადაწყვეტაში. ხაზგასმით მინდა აღვნიშნო, რომ პრემიერ-მინისტრისგან ვიგრძენი კომპანიის მიმართ სრული მხარდაჭერა და დახმარების გულწრფელი სურვილი, რადგან ეს საკითხი არა მხოლოდ ბადაგონს, არამედ მთელ ჩვენს ქვეყანას ეხება”, – განაცხადა გიორგი სალაყაიამ.

სალაყაიას თქმით, „ბადაგონის“ თბილისის სათაო ოფისი დროებით იკეტება და მუშაობას აგრძელებს კახეთში, რათა შესრულდეს უცხოელი პარტნიორების წინაშე აღებული ვალდებულებები.

7 თებერვალს, კომპანია "ბადაგონში" ფინანსთა სამინისტროს საგამოძიებო სამსახური შევიდა. უწყების ცნობით, გამოძიების დაწყებას საფუძვლად დაედო შპს ,,ბადაგონის“ ყოფილი მეწილის, კომპანია „გრაკორო თრეიდინგ ლიმიტედის“ წარმომადგენლის განცხადება. კერძოდ, გამოძიება შპს „ბადაგონის“ მიერ დიდი ოდენობით წილის მართლსაწინააღმდეგოდ მითვისების ფაქტზე დაიწყო. 

კომპანია "ბადაგონის" 100% წილის მფლობელი დღეს გიორგი სალაყაიაა, თუმცა წლების განმავლობაში ამ კომპანიაში წილს „გრაკორო ტრეიდინგ ლიმიტედი“ ფლობდა, რომელიც 2010 წლის თებერვალში ბადაგონის 100% წილის მფლობელად ირიცხებოდა.

სალაყაიას მხარე დავის სასამართლოში წარმართვას ემხრობა, "გრაკო ტრეიდინგ ლიმიტედი" კი ამბობს, რომ წილების უკანონო მითვისება სამოქალაქო დავა არ არის და საგამოძიებო სამსახურს ამიტომ მიმართეს.