ცნობილია თბილისის რომელ უბანშია ბინები ყველაზე ძვირი და იაფი

2017 წელს საცხოვრებელი უძრავი ქონების გასაყიდი ფასების ინდექსი უმეტესად შემცირების ტენდეციით ხასიათდებოდა, ხოლო მესამე კვარტალში ინდექსი ისტორიულ მინიმუმამდე შემცირდა - ამის შესახებ ნათქვამია თიბისი ბანკის, ISET-ის კვლევითი ინსტიტუტისა და forset-ის ერთობლივი პროექტის უძრავი ქონების ლაბორატორიის (REM lab) კვლევაში.

კვლევაში აღნიშნულია, რომ შემცირების ტენდენცია შეინიშნებოდა საცხოვრებელი უძრავი ქონების გაქირების ფასების ინდექსშიც. წლის განმავლობაში საცხოვრებელი უძრავი ქონების საშუალო გასაყიდი ფასი (1 კვ.მ) $791 - $866-ის ფარგლებში მერყეობდა, გაქირავების ფასმა (1 კვ.მ.) კი $7.0-$7.4 შეადგინა.

საცხოვრებელი უძრავი ქონება ყველაზე ძვირი მთაწმინდის რაიონშია (გასაყიდი ფასი – $1,012, გაქირავების ფასი $8.5), ყველაზე იაფი კი – გლდანში (გასაყიდი ფასი – $535, გაქირავების ფასი – $4.3). აღსანიშნავია, რომ
საცხოვრებელი უძრავი ქონების საშუალო გასაყიდი ფასი თბილისის თითქმის ყველა რაიონშია შემცირებულია, მაშინ როცა საშუალო გაქირავების ფასი თითქმის უცვლელია.

2017 წლის მეორე კვარტლიდან დაიწყო კომერციული უძრავი ქონების გასაყიდი ფასების ინდექსის შემცირება, შედეგად 2017 წლის მეოთხე კვარტალში ინდექსი ყველაზე დაბალ ნიშნულზე დაფიქსირდა, შედეგად კომერციული უძრავი ქონების საშუალო გასაყიდი ფასი (1 კვ.მ) $1,032-მდე შემცირდა. რაც შეეხება კომერციული უძრავი ქონების გაქირავების ფასების ინდექსს, ის ბოლო წლებში ზრდადი ტენდენციით ხასიათდებოდა,
ხოლო 2017 წელს ინდექსი მნიშვნელოვნად შემცირდა.

2017 წელს უძრავი ქონების ბაზარი გააქტიურებულია აგრეთვე ბათუმსა და ქუთაისშიც. ბაზრის გააქტიურების ფონზე უძრავი ქონების საშუალო გასაყიდი ფასი შემცირებულია როგორც ბათუმში (-1.7%), ასევე ქუთაისში (-3.9%). თუმცა ბათუმში უძრავი ქონების საშუალო გასაყიდი ფასი (1 კვ.მ. – $739) კვლავ 2-ჯერ აღემატება ქუთაისში უძრავი ქონების გასაყიდ საშუალო ფასს (1 კვ.მ. – $354).