აჭარაში მოსახლეობა ამბობს, რომ თხილის მოსავალი 100%-ით გაფუჭდა

ქობულეთის მუნიციპალიტეტის სოფელ წყავროკაში მოსახლეობა ამბობს, რომთხილის მოსავლის დიდი ნაწილი გაფუჭებულია. ადგილობრივი ხვიჩა გამარჯობაძე ამბობს, რომ ოჯახები შემოსავლის გარეშე რჩებიან, რადგან ეს მათი შემოსავლის ერთადერთი წყაროა. სოფელში თითქმის ყველა მოსახლეს თხილის პლანტაცია აქვს. ინფორმაციას "აჭარის ტელევიზია" ავრცელებს.

ადგილობრივების თქმით, მიმდინარე წელს ხეებს უცნაური დაავადებები დაემართა, რამაც თხილის გულის სიდამპლე გამოიწვია. ისინი დახმარებას აჭარის სოფლის მეურნეობის სამინისტროს სთხოვენ.

​''თხილის მოსავლის 80% გაფუჭებულია, ჯერ ფაროსანას ''შედეგი'' არ არის, ისე არის მოსავალზე მოდებული მწერი, იმ დარჩენილ 20%-საც ფაროსანა გაანადგურებს.  რაღაც ახალი დაავადებებია, რამაც თხილის გულის სიდამპლე და სიშავე გამოიწვია. კრედიტები გვაქვს თხილის მოვლისთვის გამოტანილი, მაგის იმედზე იყო გლეხობა და ფერმერობა. სამინისტროში ამხელა ბიუჯეტია, მოვიდნენ და გვითხრან, რა დაავადებასთან გვაქვს საქმე, ერთობლივი ძალებით რომ ვებრძოლოთ და სამომავლოდ მაინც გადავარჩინოთ თხილის კულტურა. სხვა ჩვენ არაფერი გვაქვს, არც მანდარინი. იქნებ კომპენსაცია მოგვცენ, ჯერ არავინ მოსულა ამბის მოსაკითხად'', - ამბობს ადგილობრივი მცხოვრები ხვიჩა გამარჯობაძე. 

სოფელ წყავროკის მკვიდრების თქმით, აზიური ფაროსანას საწინააღმდეგო პრეპარატებით ნარგავები ორჯერ შეწამლეს, თუმცა შედეგი ვერ მიიღეს. 

''​მწერი ახლა იწყებს მოქმედებას. ​რამდენჯერ მივმართეთ აგროცენტრებს,  ვთხოვდით დახმარებას, ვეკითხებოდით რა შხამქიმიკატებით უნდა შეგვეწამლა ხეები, მოსავალი რომ არ გაფუჭებულიყო. სინჯებიც ჩაჰქონდა ხალხს, საბოლოოდ მაინც ვერ გვეუბნებიან რასთან გვაქვს საქმე, საკითხი მარჩიელობის დონეზეა'', - ამბობს მოსახლეობა და დღეს აქციასაც აანონსებს.

აჭარის სოფლის მეურნეობის სამინისტროში ამბობენ, რომ ​სოფლის მეურნეობის სამეცნიერო კვლევითი ცენტრის ბოლო სამი წლის მონაცემებით, დასავლეთ საქართველოში და მათ შორის აჭარაში, მოსავლის შემცირების უმთავრესი მიზეზი არის თხილის ნაყოფის ბაქტერიული სიდამპლე.

"21 ცალი აპარატი უკვე გაცემულია. ეს პატარა ციფრი არ არის, იმიტომ, რომ დიდი წარმადობის მქონე შემასხურებელია. ის საკმაოდ დიდ ფართობს ამუშავებს. აპარატურას სამინისტრო 80% თანადაფინანსებით გასცემს. ვურჩევთ, წამლობითი ღონისძიების გატარება ადრე გაზაფხულიდან დაიწყონ. ნებისმიერ ფერმერს შეუძლია მოვიდეს ჩვენთან და რჩევებიც მიიღონ. ექსტენციის პროგრამაც ხორციელდება, მხოლოდ წყავროკაში 4 მეცადინეობა ჩატარდა. შეხვედრებზე ზუსტად ამაზე საუბრობენ, როგორ დაიცვან მცენარეები. უნდა მივიდნენ მოუსმინონ, აქტიურად ჩაერთონ", - ამბობენ აჭარის სოფლის მეურნეობის სამინისტროში.

გასულ წელს მავნებელმა განსაკუთრებით ფერმერები დააზარალა. დასავლეთ საქართველოში მოსახლეობამ თხილის გამო 60-დან 80 მილიონ დოლარამდე იზარალა. მავნებელთან ბრძოლა წელს უფრო ადრე დაიწყო. საქართველოს ბიუჯეტიდან ფაროსანას წინააღმდეგ ბრძოლის ღონისძიებებისთვის 50 მილიონი ლარი დაიხარჯება. ასევეა დონორების დახმარებაც. ფაროსანას სამიზნე ისევ სამეგრელო, გურია და იმერეთია.