მუცოს ხეობაში საოჯახო სასტუმროების მოწყობის მსურველებს სახელმწიფო დაეხმარება

ციხე-ქალაქ მუცოში საოჯახო ტიპის სასტუმროების მოწყობის მსურველებს სახელმწიფო დაეხმარება. მუცოში რეაბილიტაცია მიმდინარეობს, რომლის 99%-იც წელს დასრულდება. ამის შესახებ ულტურული მემკვიდრეობის დაცვის ეროვნული სააგენტოს დირექტორმა ნიკოლოზ ანთიძემ თქვა. ინფორმაციას bpn.ge ავრცელებს.

"დარჩება მხოლოდ ზედა ნაწილში ახლადგამოვლენილი ნაეკლესიარისა და ერთი კოშკის რეაბილიტაცია, რომელიც თავისი აგების მეთოდოლოგიიდან გამომდნარე ერთ წელიწადში ვერც განახლდება და ეს უკვე მომავალ წელს დასრულდება. 

ამის პარალელურად იქ უკვე გაჩნდა ინიციატივები, რომ საოჯახო ტიპის სასტუმროები მოაწყონ, თუმცა ჩვენთან ჯერჯერობთ განაცხადი არ შემოსულა", - თქვა ნიკოლოზ ანთიძემ.

ანთიძის განმარტებით, სამუშაო ჯგუფისთვის გამოყოფილი და მოწყობილი ინფრასტრუქტურის ნაწილი შესძლებელია, რომ ასევე საოჯახო ტიპის სასტუმროდ გადაკეთდეს. მისი თქმით, იმ კერძო პირებს, ვინც სასტუმროს მოწყობის ინიციატივით გამოვლენ, სააგენტოს მხრიდან მაქსიმალური ხელშეწყობა ექნებათ.

"სამწუხაროა, რომ ჯერ სურვილით არავის მოუმართავს. ეს არის ისტორიული გარემო და შესაბამისი პროექტები ჩვენთან უნდა იხილებოდეს. კერძო ინიციატივებს, რა თქმა უნდა, ექნება ხელშეწყობა. პირველ რიგში დავეხმარებით, რომ პროექტები იყოს სრულფასოვანი. თუ რამე ხარვეზები იქნება, ჩვენვე ვუზრუნველვყოფთ, რომ გამოსწორდეს, რათა ნებართვების თვალსაზრისით პრობლემა არ შეექმნათ. ასევე ყველა ის პირობა, რომელიც ინიციატორს სახელმწიფომ შეიძლება შეუქმნას, მაგალითად, ადგილის შერჩევა თუ ნებისმიერი სხვა დეტალი, მაქსიმალურად ექნებათ. მთავარია ოფიციალურად გამოჩნდნენ, თორემ ინფორმაციები გვაქვს, რომ ვიღაცას სურვილი აქვს, ადგილებსაც არჩევენ, მაგრამ ჩვენთან არავინ მოსულა", - თქვა ნიკოლოზ ანთიძემ.

მუცოს რეაბილიტაციაზე 3.7 მილიონი ლარი დაიხარჯა. აქედან 1.7 მილიონი სახელმწიფო დაფინანსებაა, დანარჩენი კი ფონდმა „ქართუმ“ გაიღო. მუცოს რეაბილიტაციის ფარგლებში უკვე 20-მდე ციხე-კოშკი აღდგა.

მუცოს რეაბილიტაცია-აღდგენის პროექტი 2014 წელს, კულტურის სამინისტროსა და ფონდი "ქართუს" მხარდაჭერის, კულტურული მემკვიდრეობის დაცვის ეროვნულმა სააგენტომ დაიწყო. 2018 წლისთვის იგეგმება სოფლის ზედა უბნის სრული რეაბილიტაცია და ინფრასტრუქტურული მოწყობა.

სოფელი მუცო მცხეთა-მთიანეთის მხარეში, დუშეთის მუნიციპალიტეტში, ისტორიულ პირიქითა ხევსურეთში, მდინარე არდოტის (არდოტისწყალი) მარჯვენა ნაპირზე მდებარეობს.