სამინისტრო: „ომეგა ჯგუფის“ თამბაქოს კომპანია ერთადერთია, რომელსაც ბიუჯეტში 50 მლნ-ზე მეტი ვალი აქვს

საქართველოს ფინანსთა სამინისტრო გამოეხმაურა ტელეკომპანია „იბერიას“ განცხადებას, რომლის მიხედვითაც, „ტელევიზიის მუშაობა სერიოზული საფრთხის ქვეშაა, რადგან მას ხელისუფლებამ გადაუკეტა დაფინანსების მთავარი წყარო“. ფინანსთა სამინისტროს განცხადების მიხედვით, მთავრობის პრიორიტეტია, ბიზნესისთვის სამართლიანი და ხელსაყრელი გარემოს უზრუნველყოფა, არსებული სამუშაო ადგილების შენარჩუნება და ახლის შექმნა.

„ომეგა ჯგუფში“ შემავალ, სიგარეტის მწარმოებელ კომპანია შპს „ოჯთ-ის“ საგადასახადო დავალიანების სახით, დღეის მდგომარეობით, ერიცხება 51 მლნ 717 ათასი ლარი, რომლის ძირითად ნაწილს შეადგენს თამბაქოს ნაწარმზე აქციზის გადასახადის გადაუხდელობა. აღნიშნული დავალიანება დეკლარირებულია გადამხდელის მიერ 2015-2018 წლებში.

ეს არის ერთადერთი კომპანია, რომელსაც 50 მილიონზე მეტი ვალი ერიცხება ბიუჯეტის წინაშე.

თანხის გადაუხდელობის გამო, ამჟამად, კომპანიის მიმართ გავრცელებულია იძულებითი ღონისძიებები - ინკასო და ყადაღა.

აღსანიშნავია, რომ ამ წლების განმავლობაში, კომპანიამ 2-ჯერ მიმართა ფინანსთა სამინისტროს შემოსავლების სამსახურს საგადასახადო დავალიანების გადანაწილებისთვის (გრაფიკისთვის), რომელიც მათი მოთხოვნის შესაბამისად გაფორმდა, თუმცა გადამხდელის მიერ გადახდის პირობების დარღვევის გამო, ორივე გრაფიკი გაუქმდა კანონმდებლობის შესაბამისად.

გარდა ამისა, კომპანიამ 11-ჯერ, წერილობით მიმართა ფინანსთა სამინისტროს შემოსავლების სამსახურს, იძულებითი ღონისძიებების არ გამოყენების/გაუქმების თხოვნით, რომელიც გათვალისწინებული იყო შემოსავლების სამსახურის მხრიდან, რათა არ შეფერებულიყო საწარმოს ფუნქციონირება.

იძულებითი ღონისძიებების გადავადების მიუხედავად, კომპანიამ საგადასახადო დავალიანების შემცირების ნაცვლად, განაგრძო დავალიანების ზრდა, რის გამოც შემოსვლების სამსახური იძულებული გახდა გამოეყენებინა მისთვის კანონით მინიჭებული ღონისძიებები“ - წერია სამინისტროს განცხადებაში. 

დღეს ტელეკომპანია „იბერიამ“ გაავრცელა განცხადება, სადაც წერია: „კომპანია ,,ომეგა ჯგუფი“, რომლის შემადგენლობაშიც შედის ტელეკომპანია ,,იბერია“, პარალიზებულია. ხელისუფლებამ მიზანმიმართულად გააჩერა ფაბრიკა. ჩვენ, ჟურნალისტებს გვაქვს ინფორმაცია, რომ ეს ხდება საგანგებოდ, რომ აღარ ისმოდეს ჩვენი ეთერიდან კრიტიკული აზრი. როგორც ჩანს, ხელისუფლების მიზანია, დახუროს ტელეკომპანია ,,იბერია“ და ვეღარ მოვახერხოთ ჩვენი პროფესიული საქმიანობის გაგრძელება. ჩვენ გვაქვს ინფორმაცია, რომ ,,ომეგა ჯგუფზე“ ხდება ზეწოლა, რათა ხელში ჩაიგდონ „ იბერია“. ჩვენ, ჟურნალისტები კატეგორიულად მოვითხოვთ, დაუყოვნებლივ შეწყდეს დარტყმა დამოუკიდებელ მედიაზე და მიეცეს მუშაობის საშუალება „ომეგა ჯგუფს“. მივმართავთ საერთაშორისო ორგანიზაციებს, დიპლომატიურ კორპუსს, სახალხო დამცველს, არასამთავრობოებსა და ჩვენს კოლეგებს, დაგვიჭირონ მხარი, რომ არ შეწყვიტოს ტელეკომპანიამ მაუწყებლობა“.

ტელეკომპანიას ფინანსური პრობლემები რამდენიმე თვის წინაც ჰქონდა. არსებული დოკუმენტის მიხედვით, კომპანიას თანამშრომლების მიმართ გარკვეულ პერიოდში სახელფასო დავალიანება ჰქონდა. ტელეკომპანიის რამდენიმე თანამშრომელმა ამ საკითხზე ჯანდაცვის მინისტრს დავით სერგეენკოსაც მიმართა. ამავე დოკუმენტით დასტურდება, რომ "იბერიამ" დასაქმებულთან კუთვნილი ხელფასის გადახდა გრაფიკით განსაზღვრა.

მაშინ, როდესაც ტელევიზიის ნაწილი ხელფასებს ითხოვდა, ნაწილი კი ხელოვნურად შექმნილ შესაძლო ფინანსურ კრიზისზე საუბრობს, რამდენიმე თვის წინ, ტელევიზიის პირდაპირი დამფინანსებელი საქართველოში "ბენტლი-მოტორსის" ოფიციალური პარტნიორი გახდა.