დავითაშვილი: წელს მევენახეების შემოსავალმა 300 მილიონ ლარს გადააჭარბა

სოფლის მეურნეობის მინისტრმა ლევან დავითაშვილმა ბრიფინგზე "რთველი 2018" შეაჯამა. მისი თქმით, 2018 წელს გადამუშავდა ​დამოუკიდებელი საქართველოს ისტორიაში რეკორდული რაოდენობის ყურძენი 230 ათასამდე ტონა, მევენახეების შემოსავლებმა კი 300 მილიონ ლარს გადააჭარბა.

"2013-2018 წლებში, მევენახეებმა კახეთსა და რაჭა-ლეჩხუმის რეგიონში, ჯამში, 950 მლნ ლარამდე შემოსავალი მიიღეს. დარგში არსებულმა პოზიტიურმა მაჩვენებლებმა შესაძლებლობა გააჩინა, რომ 2018 წლის რთველის პერიოდში ყურძენზე სუბსიდია აღარ გაცემულიყო. ყურძნის ფასის დადგენა საბაზრო ეკონომიკის საფუძვლებზე მოხდა. მევენახეებისგან ყურძნის მიღებისა და გადამუშავების პროცესში, სხვადასხვა ეტაპზე, 280-ზე მეტი კერძო კომპანია იყო ჩართული, რაც განაპირობებდა ყურძნის ჩაბარების შეუფერხებელ პროცესს.

ყურძენი ღვინის საწარმოებს 22 ათასმა მევენახემ ჩააბარა, რაც ასევე რეკორდული მაჩვენებელია და რაც იმას ნიშნავს, რომ ქვეყანაში იმატა ვენახების რაოდენობამ, რომ გაჩნდნენ ახალი მევენახეები და რომ სახელმწიფოს მიერ ბოლო წლებში, მევენახეობა-მეღვინეობის დარგში სწორი პოლიტიკა და რეფორმები გატარდა“, – განაცხადა დავითაშვილმა.

სოფლის მეურნეობის მინისტრის თქმით, 2017 წელს ექსპორტზე ღვინო 270-მა კომპანიამ გაიტანა, მიმდინარე წლის 9 თვის მონაცემებით კი, უკვე 260-მა კომპანიამ განახორციელა ექსპორტი.

ამასთან, ლევან დავითაშვილმა აღნიშნა, რომ 2014 წელს ქვეყნის მევენახეობა-მეღვინეობის დარგის განვითარებისთვის უმნიშვნელოვანესი პროგრამის ვენახების კადასტრის მასშტაბური პროექტის განხორციელება დაიწყო. პროექტი 2014 წელს რაჭა-ლეჩხუმის რეგიონში განხორციელდა, 2015 ყვარელში, 2016 თელავში, 2017 – ახმეტის და 2018 წელს – გურჯაანის მუნიციპალიტეტში.

„ხარისხის კონტროლი და სერტიფიცირება დაინერგა აღრიცხვის, რეგისტრაციისა და სერტიფიცირების ელექტრონული სისტემები. ღვინისა და ალკოჰოლიანი სასმელების ხარისხის კონტროლის გაუმჯობესების მიზნით, 2017 წელს განხორციელდა საკანონმდებლო ცვლილებები „ვაზისა და ღვინის შესახებ საქართველოს კანონში“.

2017 წელს, ღვინის ეროვნული სააგენტოს სადეგუსტაციო კომისიამ ყურძნისეული წარმოშობის ალკოჰოლური სასმელების ორგანოლეპტიკური ტესტირების მიზნით, 110 დეგუსტაცია ჩაატარა. მიმდინარე წლის 9 თვეში კი, უკვე 190 დეგუსტაცია.

2017 წელს ალკოჰოლური სასმელების კომპანიებში განხორციელდა როგორც საექსპორტო ადგილწარმოშობის, ასევე სუფრის ღვინოებისა და ღვინის ბრენდის 88 საინსპექციო კონტროლი“, – განაცხადა ლევან დავითაშვილმა.