რა ცვლილებებია 2019 წლის ბიუჯეტის გადამუშავებულ ვერსიაში

საქართველოს მთავრობამ პარლამენტში 2019 წლის ბიუჯეტის პროექტი დააბრუნა. 2019 წლის სახელმწიფო ბიუჯეტის გადამუშავებულ ვერსიაში სახელმწიფო ბიუჯეტის შემოსულობები პირველ წარდგენასთან შედარებით 357 მლნ ლარით იზრდება, მათ შორის გადასახადები - 80 მლნ ლარით; გრანტები - 102 მლნ ლარით, კრედიტები - 145 მლნ ლარით, მათ შორის საბიუჯეტო დახმარება 90 მლნ ლარით. 

პირველ წარდგენასთან შედარებით, გადამუშავებული ვერსიის 268 მილიონი ლარით იზრდება სახელმწიფო ბიუჯეტის გადასახდელები მათ შორის: სოციალურად დაუცველი ბავშვებისათვის 50 ლარის ღირებულების პაკეტის გასაცემად (20 ლარიანი ფულადი დახმარება + 30 ლარიანი კვების ვაუჩერი) - 70 მლნ ლარი; თავდაცვის სამინისტროს აღჭურვისთვის - 92 მლნ ლარი; საკრედიტო საგარანტიო სქემის ასამოქმედებლად მეწარმეობის განვითარების პროგრამას 10 მლნ ლარი ემატება და ჯამურად ამ მიმართულებით 20 მლნ ლარი იქნება გათვალისწინებული.

გადამუშავებული ვერსიით, 10 მილიონი ლარით იზრდება გაზიფიცირების პროგრამის ბიუჯეტი და ჯამურად რეგიონებში გაზიფიცირებისთვის მომავალ წელს 40 მილიონი ლარი დაიხარჯება.

გადამუშავებული ვერსიით 34 მილიონი ლარით იზრდება გარემოს დაცვისა და სოფლის მეურნეობის პროგრამების დაფინანსება, მათ შორის ფაროსანას საწინააღმდეგო ღონისძიებებისათვის გამოიყოფა 10 მილიონი ლარი.

2019 წლის სახელმწიფო ბიუჯეტის პროექტის პირველ წარდგენასთან შედარებით, გადამუშავებულ ვერსიაში 267.9 მლნ ლარით არის გაზრდილი ბიუჯეტის ასიგნებები, საბიუჯეტო სახსრების ნაწილში ზრდა შეადგენს 212.9 მლნ ლარს, ხოლო საინვესტიციო კრედიტების ნაწილში - 55 მლნ ლარს. სახელმწიფო ბიუჯეტის ხარჯების ჯამური მოცულობა 142.4 მლნ ლარით იზრდება და 9 421.5 მლნ ლარს შეადგენს. 

უფრო კონკრეტულად, ბიუჯეტის პროექტის პირველ ვერსიასთან შედარებით, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს დაფინანსება 73.9 მლნ ლარით იზრდება და შეადგენს 3 937.0 მლნ ლარს.

37.7 მლნ ლარით იზრდება, პირველად წარდგინებასთან შედარებით, განათლების, მეცნიერების, კულტურისა და სპორტის სამინისტროს დაფინანსება და1 522,7 მლნ ლარს შეადგენს.

ბიუჯეტის პროექტის გადამუშავებული ვერსიით, გაზრდილია გარემოს დაცვისა და სოფლის მეურნეობის სამინისტროსთვის გამოყოფილი ასიგნებები, ზრდა 34.2 მლნ ლარს შეადგენს და უწყების ბიუჯეტი ჯამურად 332,3 მლნ ლარით არის განსაზღვრული.

გადამუშავებულ ვარიანტში, გაზრდილია ეკონომიკისა და მდგრადი გავითარების სამინისტროს (20 მლნ ლარით), იუსტიციის სამინისტროს (1,5 მლნ ლარით), საგარეო საქმეთა სამინისტროს (9,5 მლნ ლარით),თავდაცვის სამინისტროს (80 მლნ ლარით),შს სამინისტროს (500 ათასი ლარით) ასიგნებები.

ამასთან, 2019 წლის ბიუჯეტის განახლებულ ვარიანტში ლარი/დოლარის კურსი 2.7 ნიშნულზე დაიგეგმა. 
პირველი წარდგენისას ლარი/დოლარის გაცვლითი კურსი 2.63-ის ნიშნულის ფარგლებში იყო. 2018 წლის ბიუჯეტში კი ლარი-დოლარის გაცვლითი კურსი 2,5-ის ნიშნულზე.

ირაკლი კოვზანაძის თქმით, სახელმწიფო ბიუჯეტის კანონპროექტის ახალი ვერსიის განხილვა ჯერ საფინანსო-საბიუჯეტო კომიტეტში, ხოლო 13 ნოემბერს ქუთაისში, პარლამენტის სესიაზე იგეგმება.