2019 წელს მუნიციპალიტეტების დაფინანსების წესი იცვლება

პარლამენტში 2019 წლის სახელმწიფო ბიუჯეტის პროექტის განხილვა რეგიონული პოლიტიკისა და თვითმმართველობის კომიტეტში მიმდინარეობს.

ბიუჯეტის პროექტით 2019 წელს მუნიციპალიტეტების დაფინანსების წესი იცვლება. კერძოდ, ადგილობრივი თვითმმართველობები მომავალ წელს გათანაბრებით ტრანსფერს აღარ მიიღებენ, საშემოსავლო გადასახადიც სრულად ცენტრალურ ბიუჯეტში წავა, ხოლო თვითმმართველობაში დღგ-ს სახით მიღებული შემოსავლების 19% დარჩება.

თვითმმართველობების დაფინანსების ახალი წესი მომავალი წლის ბიუჯეტის პროექტში უკვე ასახულია. ფინანსური დოკუმენტის ავტორები ამბობენ, რომ ახალი წესი თვითმმართველობების დაფინანსებას გაზრდის.

"არსებული სისტემის შენარჩუნების შემთხვევაში, მუნიციპალიტეტების დაფინანსება (საშემოსავლო გადასახადი და გათანაბრებითი ტრანსფერი) 2019 წელს იქნებოდა 900,6 მლნ ლარი (ოკუპირებულ ტერიტორიებზე არსებული მუნიციპალიტეტების გარდა), რაც 2018 წლის მაჩვენებელზე 61,9 მლნ ლარით მეტია. დაფინანსების ახალი სისტემის მიხედვით აღნიშნული მუნიციპალიტეტების დაფინანსება შეადგენს 946,6 მლნ ლარს, რაც 2018 წლის მოცულობაზე 107,9 მლნ ლარით მეტი, ხოლო ძველი სისტემით გაანგარიშებულ 2019 წლის მოცულობაზე 46,0 მლნ ლარით მეტია", – წერია 2019 წლის ბიუჯეტის პროექტში.

ბიუჯეტის პროექტის თანახმად, დაფინანსების ახალი წესით, დღგ-ს 19%-იდან, დედაქალაქს – 50.01%, 4 თვითმმართველი ქალაქს ჯამში – 11.19%, დანარჩენ 58 მუნიციპალიტეტს კი 38.8% ერგება. კონკრეტულად, რომელ მუნიციპალიტეტს რა ოდენობის თანხა შეხვდება, იხილეთ droa.ge-ს მიერ მომზადებულ სტატიაში. 

2019 წლის სახელმწიფო ბიუჯეტი 12 729 700 000 ლარით არის განსაზღვრული. ეს ქვეყნის მთავარი ფინანსური დოკუმენტის პირველადი ვარიანტია, რომელიც მთავრობიდან პარლამენტში უკვე შევიდა.