ავეჯის კომპანიების ხელშეწყობისთვის კადრების გადამზადების ცენტრი შეიქმნება

საქართველოს ეკონომიკისა და მდგრადი განვითარების მინისტრი გიორგი ქობულია ავეჯის მწარმოებელი კომპანიების ხელმძღვანელებს შეხვდა.  შეხვედრაზე სექტორში კვალიფიციური კადრების ზრდის ხელშეწყობასა და ამისთვის სპეციალური პროგრამების შექმნაზე ისაუბრეს.

ხის დამამუშავებელთა და ავეჯის მწარმოებელთა ასოციაციის პრეზიდენტის, ბორის ივანიშვილის შეფასებით, მინისტრთან შეხვედრა საინტერესო და შედეგიანი იყო. „მინისტრმა მოისმინა ის პრობლემები, რომლებიც აქვს ავეჯის წარმოებას, ხის დამუშავებას და მისგან გარკვეული დაპირებებიც იქნა გაცემული, მათ შორის, მთავარი, რაც დღეს აქვს ავეჯის მწარმოებლებს, არის მენეჯმენტის და პროფესიონალი მუშახელის მომზადება. დაისვა საკითხი, რომ ამისთვის გარკვეული ბაზა შეიქმნას, გაიხსნას სასწავლო ცენტრი, სადაც მოწვეული იქნებიან უცხოელი სპეციალისტები და მოხდეს შესაბამისი განათლების მიღება“ - აღნიშნა ასოციაციის ხელმძღვანელმა.

კადრების გადამზადების აუცილებლობაზე აკეთებს აქცენტს საზოგადოებრივი კოლეჯის, „სპექტრის“ დირექტორი მათე ტაკიძეც. მისი შეფასებით, ძალიან მნიშვნელოვანია, როცა პროფესიულ განათლებასთან მიმართებაში ეკონომიკის მინისტრის ხედვა კონკრეტულად არის ჩამოყალიბებული. „ავეჯის წარმოებაში დღეს ერთ-ერთი მთავარი პრობლემა არის ადამიანური რესურსი და კვალიფიკაციის ნაკლებობა. პრინციპში, დღეს მოხდა შეთანხმება, რომ მომავალი წლიდან დაიგეგმოს მინიმუმ ორი ათასი ადამიანის გადამზადება, რაც გაზრდის როგორც ქართული წარმოებას, ასევე ხელს შეუწყობს ქვეყანაში ეკონომიკის განვითარებას. ვთვლი, რომ შეხვედრა მინისტრთან, სადაც კონკრეტული გადაწყვეტილებები მიიღება, უმნიშვნელოვანესია ბიზნესისთვის“ - განაცხადა ტაკიძემ.

ავეჯის მწარმოებელ კომპანიებთან შეხვედრა სავაჭრო-სამრეწველო პალატის ორგანიზებით თბილისში, „ხელოსნების ქალაქში“ გაიმართა, სადაც 200-ზე მეტი საწარმო მუშაობს.