ივანე მაჭავარიანი „ომეგა ჯგუფს“ ვალის შემცირების ადეკვატური გრაფიკის წარდგენას სთავაზობს

„ომეგა ჯგუფმა“ 52 მილიონი ლარი დააგროვა. ამავდროულად, არც ამცირებდა ამ ძველ ვალს და ყოველ თვე ახალ ვალს აგროვდებდა და შეუძლებელია ეს გაგრძელებულიყო"- ამის შესახებ ფინანსთა მინისტრმა „იმედის“  გადაცემაში „პირისპირ“ განაცხადა.

ივანე მაჭავარიანის თქმით, კომპანიამ სამინისტროს თავადვე მიმართა თავისივე შედგენილი გრაფიკით, თუმცა დაარღვია.

„ჩვენ პოლიტიკური მოტივებით არასდროს გაგვივრცელებია იძულებითი ღონისძიებები, როგორიცაა ინკასო და ყადაღა და არც ახლა. თუ მოვლენ და აზრიან წინადადებას მოიტანენ, მზად ვართ თანამშრომლობითისთვის"- განაცხადა ფინანსთა მინისტრმა.

ივანე მაჭავარიანმა კომპანიას შესთავაზა ვალის შემცირების მისაღები გრაფიკი წარადგინოს.

„არა ისეთი, რომ შემდეგი 50 ან 100 წელი ამცირონ, არამედ გონივრული. მიმდინარე დავალიანება არ გაზარდონ, შევიმუშავოთ მეთოდი და იმუშავებს ქარხანა"- განაცხადა ფინანსთა მინისტრმა. 

27 ოქტომბერს ცნობილი გახდა, რომ "ომეგა ჯგუფმა" ბიუჯეტში საკუთარი დავალიანებიდან 1 მილიონი ლარი შეიტანა. მაშინ imedinews-თან ომეგას გენერალურმა მენეჯერმა, ლევან აღდგომელაშვილმა გადახდილი ვალის ნაწილის სულ სხვა ოდენობა - 2 მილიონი ლარი დაასახელა. 

შემოსავლების სამსახურში კი თქვეს, რომ თუ ამ თანხაში კომპანია აქციზური მარკების შესაძენ საფასურსაც გულისხმობს, ეს ვალის უზრუნველყოფას არ ნიშნავს.

ომეგა ჯგუფსა და სახელმწიფოს შორის წარმოქმნილი უთანხმოება, რომელიც რამდენიმე თვეა გრძელდება, სწორედ კომპანიის მხრიდან ბიუჯეტის მიმართ არსებულ დავალიანებას უკავშირდება, თუმცა ამ ფაქტს ორივე მხარე სხვადასხვაგვარად აღიქვამს. 

ომეგა აცხადებდა, რომ სახელმწიფო მასზე რეკეტს ახორციელებდა და ამის დასტურად სხვადასხვა მედიასაშუალებებით ფარული ჩანაწერების სერიის გამოქვეყნება დაიწყო, ხელისუფლება კი ამ ყველაფერს აფასებდა სახელმწიფოს მიმართ 50 მილიონი ლარის ოდენობით ვალის თავიდან აცილების მცდელობად.