მაჭავარიანი: „ოჯითის“ მიერ წარმოდგენილი ვალის დაფარვის გრაფიკი საღ აზრს სცილდება

შპს „ოჯითის“ მიერ წარმოდგენილი ვალის დაფარვის გრაფიკი სცილდება ნებისმიერ საღ აზრს, - ამის შესახებ ფინანსთა მინისტრმა ივანე მაჭავარიანმა გადაცემაში „პირისპირ“ ილაპარაკა. 

მან „ოჯითის“ საკითხთან დაკავშირებით შექმნილ რეალურ სურათზე და იმ წინადადებაზე, რომელიც კომპანიის წარმომადგენლებს ფინანსთა სამინისტრომ შესთავაზა. როგორც მან განაცხადა, მას შემდეგ, რაც კომპანიამ ბიუჯეტში გადაიხადა 1 მილიონი ლარი, შპს-მ მიიღო მისი ადეკვატური აქციზური მარკები.

„ჩვენ მოვხსენით ყადაღა საბრუნავ საშუალებებს და ვთხოვეთ კომპანიას წარმოედგინათ წინადადებები ვალის შემცირების თაობაზე. ამის შემდეგ იწყება ისევ ტყუილების კორიანტელი. მათ განცხადებაში წავიკითხე - ფინანსთა მინისტრმა შემოგვთავაზა მორიგებაო მაშინ, როდესაც თავად მოიტანეს ფურცელზე დაწერილი გრაფიკი, სადაც ეწერა: 52 მილიონი ლარიდან 42 მილიონამდე ჩამოგვაწერეთ, 10 მლნ ლარზე მეტი 2 წლით გაგვიყინეთ და 2 წლის შემდეგ, თანხას ნაწილ-ნაწილ გადავიხდითო. ჩვენ ვუთხარით, მოგვეცით, ვნახავთ ამ წინადადებას...მე იმავე შეხვედრაზე ვუთხარი, არ მიგაჩნიათ, რომ თუკი ვალის შემცირების გრაფიკს შემოგვთავაზებთ, შანსები, რომ ჩვენ ამ წინადადებას დავთანხმდეთ უფრო მაღალია? ვუთხარით, წაბრძანდით, გადახედეთ და ვთხოვეთ, ხელახლა მობრძანებულიყვნენ. იმედი მაქვს, ესეც ჩაწერილი ექნებათ რამდენაირად და გამოიტანენ... „ - განაცხადა ფინანსთა მინისტრმა.

მისი თქმით, მას სურდა კომპანიის წარმომადგენლებთან გამართულ შეხვედრას ბრიტანეთის საელჩოს წარმომადგენელიც დასწრებოდა.

„მინდოდა ამ შეხვედრას დასწრებოდნენ საელჩოდან იმიტომ, რომ გამოცდილება მქონდა, როცა აბსოლუტურად სხვა რამეზე იყო საუბარი შეხვედრებზე და სხვა რამეს ამბობდნენ ტელევიზიით. მაგალითად, ჩემთან პირველ შეხვედრაზე თქვეს, ფინანსთა მინისტრმა დაგვიბარაო მაშინ, როდესაც ერთი კვირა თავად ითხოვდნენ ჩემთან შეხვედრას. თუმცა, საელჩოს წარმომადგენელმა ვერ შეძლო შეხვედრაზე დასწრება, თუმცა შეგიძლიათ ეს გადაამოწმოთ და დარწმუნებული ვარ, დაადასტურებენ ამას საელჩოში, რომ ჩვენგან ასეთი წინადადება ნამდვილად იყო. როგორ დამთავდა შეხვედრა? გითხარით, რომ ვთხოვეთ წარმოედგინათ რეალური გრაფიკი ვალის შემცირების. ახლა მათი მოტანილი შეთანხმება, რომელიც იყო აბსურდული „გასაღებულია“ თითქოს ჩვენ შევთავაზეთ კომპანიას ეს წინადადება და ახლა არ ვასრულებთ პირობებს. ეს, კიდევ ვიმეორებ, სცდება ნებისმიერ საღ აზრს“, - აღნიშნა მაჭავარიანმა.

27 ოქტომბერს ცნობილი გახდა, რომ "ომეგა ჯგუფმა" ბიუჯეტში საკუთარი დავალიანებიდან 1 მილიონი ლარი შეიტანა. მაშინ imedinews-თან ომეგას გენერალურმა მენეჯერმა, ლევან აღდგომელაშვილმა გადახდილი ვალის ნაწილის სულ სხვა ოდენობა - 2 მილიონი ლარი დაასახელა. 

შემოსავლების სამსახურში კი თქვეს, რომ თუ ამ თანხაში კომპანია აქციზური მარკების შესაძენ საფასურსაც გულისხმობს, ეს ვალის უზრუნველყოფას არ ნიშნავს.

ომეგა ჯგუფსა და სახელმწიფოს შორის წარმოქმნილი უთანხმოება, რომელიც რამდენიმე თვეა გრძელდება, სწორედ კომპანიის მხრიდან ბიუჯეტის მიმართ არსებულ დავალიანებას უკავშირდება, თუმცა ამ ფაქტს ორივე მხარე სხვადასხვაგვარად აღიქვამს. 

ომეგა აცხადებდა, რომ სახელმწიფო მასზე რეკეტს ახორციელებდა და ამის დასტურად სხვადასხვა მედიასაშუალებებით ფარული ჩანაწერების სერიის გამოქვეყნება დაიწყო, ხელისუფლება კი ამ ყველაფერს აფასებდა სახელმწიფოს მიმართ 50 მილიონი ლარის ოდენობით ვალის თავიდან აცილების მცდელობად.