კომიტეტებში 2018 წლის ბიუჯეტში დაგეგმილი ცვლილებების პროექტის განხილვა იწყება

პარლამენტი 2018 წლის სახელმწიფო ბიუჯეტში დაგეგმილი ცვლილებების განხილვას 10 დეკემბრიდან იწყებს. ცვლილებებს ხვალ რამდენიმე კომიტეტში განიხილავენ დეპუტატები. ინფორმაციას სააგენტო "ინტერპრესნიუსი" ავრცელებს.

პარლამენტს მთავრობამ მიმდინარე წლის ბიუჯეტში ცვლილებების პროექტი 5 დეკემბერს წარუდგინა. 2018 წელს მთავრობის სარეზერვო ფონდი იზრდება, ასევე იზრდება თითქმის ყველა სხვა მხარჯავი დაწესებულების ბიუჯეტი, გარდა ინფრასტრუქტურის სამინისტროსი, რომელსაც ბიუჯეტის ათვისებაში პრობლემები შეექმნა. 

“2018 წელს დაგეგმილი იყო მასშტაბური საგზაო პროექტების დაწყება, მათ შორის ჩქაროსნული მაგისტრალის რიკოთის მონაკვეთი და ჩრდილოეთი-სამხრეთი მაგისტრალის ურთულესი მონაკვეთი (ქვეშეთი-კობი). აღნიშნული პროექტები გამოირჩევა კომპლექსურობით და წინა მოსამზადებელი სამუშაოების ხანგრძლივი და რთული ეტაპებით, შესაბამისად, პროექტები ნაწილობრივ გადაინაცვლებს შემდეგ წლებში. გასათავლისწინებელია, რომ რიკოთის მონაკვეთის 4 კომპონენტიდან მიმდინარე წელს პირველი ტრანშები გადაირიცხება ორ მონაკვეთზე. ზოგიერთი პროექტის შესრულების ვადების გადაწევასთან ერთად ბიუჯეტში ხდება ამ პროექტებისთვის დონორების მიერ გამოყოფილი საკრედიტო რესურსების კორექტირებაც“, - ნათქვამია დოკუმენტის განმარტებით ბარათში.

2018 წლის ბიუჯეტის პროექტში შესული ცვლილებების მიხედვით, 10 მილიონი ლარით იზრდება მთავრობის სარეზერვო ფონდი. დევნილთა განსახლების ღონისძიებებისათვის დამატებით 45 მლნ ლარით გამოიყოფა დევნილთა სახლების შეძენისათვის, რითაც დამატებით 500-ე მეტი დევნილი ოჯახის დაკმაყოფილება იქნება შესაძლებელი.

ასევე იზრდება რეგიონებში განსახორციელებელი პროექტების ფონდის მოცულობა 40 მილიონით და იქნება 300 მლნ ლარი. 

170 მლნ ლარით იზრდება მუნიციპალიტეტებისათვის გადასაცემი ტრანსფერების მოცულობა.

რაც შეეხება მიმდინარე წელს მისაღებ გრანტებს, ეს მაჩვენებელიც მცირდება - 74.3 მლნ ლარით.