როგორ უნდა მოიქცეთ თუ თქვენი მონაცემები vali.ge-ზე ვერ იპოვეთ. რჩევა

ფინანსთა სამინისტრომ Facebook-ის საკუთარ გვერდზე გამოაქვეყნა ინფორმაცია იმის შესახებ, თუ როგორ უნდა მოიქცნენ ადამიანები, რომელთაც საკუთარი თავი ვებგვერდზე vali.ge ვერ იპოვეს.

„თუ ფიქრობთ, რომ გეხებათ სესხის პატიების პროგრამა, მაგრამ ვერ იპოვეთ თქვენი მონაცემები აღნიშნულ სიაში, გთხოვთ მიმართოთ იმ ფინანსურ სუბიექტს, ვისი ფინანსური დავალიანებაც გაქვთ და სთხოვოთ ბაზაში თქვენი მონაცემების ატვირთვა;

თუ თქვენ ნახავთ თქვენს მონაცემებს აღნიშნულ ბაზაში ეს ნიშნავს, რომ თქვენზე გავრცელდა სესხის პატიების პროექტი, შესაბამისად, უნდა დაელოდოთ 31 დეკემბერს, როდესაც დასრულდება სესხის პატიების პროცესი“ - წერია ფინანსთა სამინისტროს გავრცელებულ განცხადებაში. 

ასევე, სამინისტროს ინფორმაციით, სესხების პატიების პროგრამა შეეხება ყველა სესხს, რომელიც მონაწილეობს პროექტში, მიუხედავად იმისა, აღსრულების ეტაპზეა თუ სასამართლო დავის პროცესში.

დღესვე, მთავრობამ ე.წ. შავ სიაში“ მყოფი მოსახლეობა გააფრთხილა. გავრცელებულ განცხადებაში წერია, რომ ამ დროისთვის, სოციალურ ქსელსა და ინტერნეტში შექმნილია რამდენიმე გვერდი, სადაც განთავსებულია სხვადასხვა საფინანსო ინსტიტუტის სარეკლამო ინფორმაციები, ამიტომ ფინანსთა სამინისტრო პრობლემური სესხების მფლობელებს აფრთხილებს, რომ სესხების შესახებ ინფორმაცია ატვირთულია მხოლოდ ვებგვერდზე vali.ge.

ვებგვერდზე Vali.ge ამ დროისთვის 407 ათასზე მეტი მსესხებლისა და 679 ათასზე მეტი სასესხო ჩანაწერის შესახებაა ინფორმაცია ატვირთული. ამ სასესხო დავალიანების მთლიანი მოცულობა შეადგენს 3 მილიარდ ლარზე მეტს.

საქართველოს პრემიერმინისტრმა, მამუკა ბახტაძემ დავალიანების განულების ინიციატივის შესახებ 19 ნოემბერს განაცხადა. მისი თქმით, საქართველოს 600 ათასზე მეტ მოქალაქეს ბანკების, ონლაინ ორგანიზაციების და სხვა საფინანსო ინსტიტუტების მიმართ დავალიანება გაუნულდება. ამასთან, პრემიერმა აღნიშნა, რომ საფინანსო ინსტიტუტებისადმი მოქალაქეთა დავალიანების განულების ინიციატივა ფონდ „ქართუს“ მხარდაჭერით განხორციელდება.