რის გაკეთებას აპირებს თბილისის მერია 2019 წელს 927 მილიონი ლარით

დედაქალაქის მერმა კახა კალაძემ თბილისის საკრებულოს მერიის 2018 წლის მუშაობის შედეგები გააცნო. დღესვე, საკრებულომ 2019 წლის თბილისის ბიუჯეტის პროექტს უნდა უყაროს კენჭი. პროექტი დეპუტატებს კალაძის მოადგილემ ირაკლი ხმალაძემ გააცნო. 

ირაკლი ხმალაძის თქმით, 2019 წლის ბიუჯეტის პროექტი 927 მილიონი ლარია, რაც 2018 წლის დამტკიცებულ ბიუჯეტთან შედარებით 66 მილიონი ლარით მეტია. 

მისი თქმით, 927 მილიონიდან საშემოსავლო ნაწილი 900 მილიონი ლარია. აქედან საგადასახადო ნაწილი დაახლოებით 658 მილიონი ლარია; გრანტების ნაწილი - 51 მილიონი, ხოლო სხვა შემოსავლები შეადგენს 190 მილიონ ლარს, რაც წინა წელთან შედარებით დაახლოებით 20 მილიონი ლარით არის გაზრდილი. 

„საშემოსავლო ნაწილში გადასახადები ეს არის დღგ და ქონების გადასახადი. ქონების გადასახადი წლევანდელთან შედარებით 2019 წელს დაგეგმილია 25 მილიონი ლარით მეტი, ხოლო დამატებული ღირებულების გადასახადის კომპონენტში დაფინანსება გვაქვს 473 მილიონი ლარის ოდენობით. კარგად მოგეხსენებათ , რომ  ამ კომპონენტმა ჩაანაცვლა გათანაბრებითი ტრანსფერი. ასევე, 51 მილიონი ლარიდან 50 მილიონი ლარი სახელმწიფოსგან წამოსული სპეციალური ტრანსფერია. 

რამდენიმე მიმართულებით საშემოსავლო ნაწილში გვაქვს ზრდა, ეს არის საქონლის და მომსახურების რეალიზაცია, რომელიც 16 მილიონით გაზრდილი ოდენობით არის დაგეგმილი, ასევე, არის ადმინისტრაციული მოსაკრებლები და გადასახდელები, რომელიც 15 მილიონი ლარით მეტი არის დაგეგმილი“, - აღნიშნა ირაკლი ხმალაძემ. 

მისი თქმით, 2018 წელს დაგეგმილი საპრივატიზაციო ნაწილი იყო 50 მილიონი ლარი, ხოლო 2019 წელს პრივატიზაციიდან 26 მილიონი ლარის მიღება იგეგმება. ირაკლი ხმალაძის განმარტებით, ეს ციფრი უშუალოდ იმ აქტივების პრივატიზაციის პოტენციალით არის გამოყვანილი, რომლის პრივატიზაციაც შეიძლება 2019 წლის განმავლობაში განხორციელდეს. 

როგორც ვიცემერმა განაცხადა, 927 მილიონიდან, დაახლოებით 328 მილიონი ლარი დაიხარჯება ჯანდაცვისა და სოციალური პროგრამების მიმართულებით. მისივე თქმით, ეს მონაცემი დაახლოებით 21-22 მილიონი ლარით მეტია 2018 წლის ხარჯებთან შედარებით. 

ინფრასტრუქტურის მიმართულებით მერია 2019 წელს 357 მილიონი ლარის დახარჯვას აპირებს, რომელიც ხმალაძის თქმით, წლის განმავლობაში კიდევ 75 მილიონი ლარით გაიზრდება.

"ამ ჭრილში მე მინდა გითხრათ, რომ 2019 წელი იქნება პირველი წელი, როდესაც თბილისის ბიუჯეტი გაცდება 1 მილიარდ ლარს. აქვე ხაზი მინდა გავუსვა, რომ საკრებულო პირველად ამტკიცებს თბილისის ბიუჯეტს, რომელიც 927 მილიონი ლარის ოდენობით არის წარმოდგენილი", - განაცხადა ირაკლი ხმალაძემ. 

მისი თქმით, 51 მლნ ლარით იზრდება სკოლამდელი აღზრდის დაწესებულებების დაფინანსება. 

„51 მილიონი ლარი ანუ ეს სხვაობა შეადგენს როგორც კაპიტალურ, ასევე მიმდინარე ხარჯების ნაწილს და მოიცავს იმ საოპერაციო ხარჯებს, რომელიც ბაღებს იმთავითვე გააჩნდათ და ვერ ხდებოდა ამის ბიუჯეტში ასახვა. ასევე, 2019 წელს განხორციელდება 11 ახალი საბავშვო ბაღის მშენებლობა და ამისათვის გათვალისწინებულია 23 მილიონი ლარი, ხოლო 20 მილიონი ლარი გათვალისწინებული ბაღების ავარიული შენობების ჩანაცვლების, გამაგრება-რეკონსტრუქციის სამუშაოებისთვის“, - განაცხადა ირაკლი ხმალაძემ. 

მისი თქმით, იზრდება  ძუძუს კიბოს პრევენციისა და მართვის მიმართულების დაფინანსება, სოციალურად დაუცველი მრავალშვილიან ოჯახთა დაფინანსება, დანგრეული სახლების სოციალურად დაუცველ მცხოვრებთა კომპენსაციისა და უფასო სასადილოების მიმართულებით გამოყოფილი დაფინანსება. 
 
როგორც ირაკლი ხმალაძემ განაცხადა, მუნიციპალიტეტი 2019 წელს გეგმავს ხიდების და გვირაბების მოწყობა-რეაბილიტაციას, რისთვისაც გათვალისწინებულია 23 მილიონ ლარამდე, მათ შორის არის მდინარე გლდანულაზე არსებული ხიდების რეკონსტრუქციის სამუშაოები, რაც დაახლოებით 4 მილიონი ლარი დაჯდება.

ასევე, იგეგმება: უნივერსიტეტის ქუჩისა და წყნეთის გზატკეცილის  დამაკავშირებელი საავტომობილო ხიდის მშენებლობა, რაც დაახლოებით 8,3 მილიონი ლარი დაჯდება; ვახუშტი ბაგრატიონის სახელობის ხიდის რეაბილიტაცია, სასტუმრო „რედისონთან“ არსებული გვირაბის, მიწისქვეშა ავტოსატრანსპორტო გასასვლელის სარეაბილიტაციო სამუშაოები. გმირთა მოედანზე არსებული მიწისქვეშა გზაგამტარის რეაბილიტაციას, რომელიც 4 მილიონ ლარამდე დაჯდება, ასევე, სანიაღვრე და წყალარინების ქსელების მოწყობა-რეკონსტრუქციას, სანიაღვრე კოლექტორების მშენებლობას, რაც ჯამში 9 მილიონ ლარზე მეტი ღირებულებისაა. კახეთის გზატკეცილის რეაბილიტაციას, ასევე, ორბელიანის მოედნის, მშრალი ხიდისა და გუდიაშვილის მოედნის სარეაბილიტაციო სამუშაოების დასრულება. 

თბილისის მერის მოადგილის თქმით, 2019 წელს, ასევე, დაიწყება 2 ახალი მულტიფუნქციური კომპლექსის მშენებლობა, განხორციელდება საბურთალოზე და ვაკის პარკში არსებული ჩოგბურთის კორტების რეაბილიტაცია.  

გარდა ამისა, დაფინანსდება ილია ჭავჭავაძის გამზირის სარეაბილიტაციო სამუშაოები; გლდანის რაიონში ხიზანიშვილის და ვეკუას ქუჩების სრული სარეაბილიტაციო სამუშაოები; მაჭავარიანის და გელოვანის დამაკავშირებელი ახალი გზის მშენებლობა, რომლისთვისაც 18 მილიონი იქნება გათვალისწინებული; დაიწყება კიდევ ერთი ისტორიული არეალის - ფიროსმანის ქუჩის სარეაბილიტაციო სამუშაოები; დაიწყება გორგასლის ქუჩის  რეაბილიტაცია და მოსწავლე ახალგაზრდობის სასახლის სარემონტო-სარეაბილიტაციო სამუშაოები, რისთვისაც 8  მილიონი ლარია გათვალისწინებული.