პრობლემური სესხების პატიების პროექტი დასრულდა

პროექტის მასშტაბიდან გამომდინარე, შეგვიძლია ვთქვათ, რომ პრობლემური სესხების პატიების პროექტი წარმატებით დასრულდა, - ამის შესახებ ფინანსთა მინისტრის მოადგილემ, ლაშა ხუციშვილმა პრობლემური სესხების განულების პროექტის შედეგების შეფასებისას განაცხადა .

მისი თქმით, ამჟამად, ვებგვერდზე vali. ge უკვე ატვირთულია მონაცემები 609 ათასზე მეტი ფიზიკური პირის 1,360, 991 სასესხო ჩანაწერის შესახებ, ხოლო ჯამური დავალიანება 4,027,099,783 ლარს შეადგენს.

„პრობლემური სესხების უდიდესი ნაწილი ფონდმა „ქართუმ“ გამოისყიდა. ამისთვის, კიდევ ერთხელ, დიდი მადლობა ფონდ „ქართუს“ და ყველა იმ საფინანსო ორგანიზაციას, რომელმაც მონაწილეობა მიიღო აღნიშნულ პროექტში“, - გააცხადა ფინანსთა მინისტრის მოადგილემ.

მისი თქმით, ფონდ „ქართუს“ შეთავაზების შემდეგ, პრობლემური სესხების განულების პროექტში დამატებით 14 საფინანსო ორგანიზაცია ჩაერთო.

„პირველიდან 15 იანვრის პერიოდში პროექტში მონაწილეობის სურვილი 14-მა არასაბანკო დაწესებულებამ გამოთქვა. მათგან 12 საფინანსო დაწესებულების მონაცემები უკვე ასახულია ვებგვერდზე. ასევე, შეთანხმება მიღწეულია ორ ორგანიზაციასთან სესხების შეძენის თაობაზე და მათი მონაცემებიც უახლოეს პერიოდში განთავსდება ვებგვერდზე. შედეგად, შეიძლება ითქვას, რომ ყველა ის სესხი, რომლის რეალიზაციის მზადყოფნა და სურვილი გამოთქვეს საბანკო და არასაბანკო დაწესებულებებმა, გამოსყიდული და ჩამოწერილია მსესხებლებზე. ამით აღნიშნული პროექტი წარმატებით დასრულდა“, - განაცხადა ლაშა ხუციშვილმა.

საქართველოს პრემიერმინისტრმა, მამუკა ბახტაძემ დავალიანების განულების ინიციატივის შესახებ გასული წლის 19 ნოემბერს განაცხადა.