კახა კალაძე უარყოფს, რომ 2009 წელს „ყაზტრანსგაზის“ წილის შეძენა სურდა

კახა კალაძე უარყოფს გავრცელებულ ინფორმაციას, რომ მას 2009 წელს სურდა „ყაზტრანსგაზის“ წილის შეძენა. ამის შესახებ დედაქალაქის მერმა მედიასთან კომენტარი დღეს გააკეთა.

კითხვაზე, 2009 წელს მას უნდოდა თუ არა, რომ შეეძინა „ყაზტრანსგაზის“ წილი, კახა კალაძე ამბობს, რომ ეს ტყუილია:

 „ტყუილია ეს. 2006-2007 წლებში ჩვენს ჯგუფს ჰქონდა ინტერესი, როცა ბიზნესსაქმიანობით ვიყავი დაინტერესებული, თუმცა როცა სააკაშვილმა გაიგო ეს ინფორმაცია, მაშინვე სპეცმმართველი შეუშვა „ყაზტრანსგაზში“ და გააუბედურა კომპანია“,- აღნიშნა კალაძემ.

კომპანია WALTBAY LTD -იმ, რომელიც საქართველოში რეგისტრირებული მსხვილი ქართული ბიზნესჯგუფის - შპს სი ბი ეს ჯგუფის ნაწილს წარმოადგენს, 2018 წლის ოქტომბერში მოაწერა ხელი ხელშეკრულებას და შპს ყაზტრანსგაზ-თბილისის 100 %-იანი წილის მფლობელი გახდა.

2017 წლიდან, საქართველოს მთავრობასა და ყაზახურ კომპანიას შორის საერთაშორისო არბიტრაჟში დავა მიმდინარეობდა. დავის საგანი, ყაზახური მხარის მოთხოვნის მიხედვით, ზიანის ანაზღაურება გახლდათ, რომელიც 486 მილიონ ლარს აჭარბებდა. ამასთან ერთად, იზრდებოდა შპს აზტრანსგაზ-თბილისის სახელმწიფოს წინაშე არსებული დავალიანება, რომელმაც 96 მილიონი ლარი შეადგინა. დამატებით, 2018 წლის 31 ივლისის მდგომარეობით, შპს ყაზტრანსგაზ-თბილისს, მფლობელი ყაზახური კომპანიების წინაშე, 347 მილიონ 721 ათას 491 ლარის ოდენობის დავალიანება ერიცხებოდა.