თბილისის მოქმედ მერს ყოფილმა უპასუხა

თბილისის მოქმედ მერს ყოფილმა უპასუხა. გიგი უგულავას განმარტებით, 2009 წელს კანონში შეტანილი ცვლილების მიხედვით, გაუქმდა ჯარიმები იმ ადამიანების მიმართ, რომლებიც ექსპლუატაციაში მიუღებელ შენობებში ცხოვრობენ.

მან კალაძე გაკეთებული განცხადებების გამო გააკრიტიკა და მერის გზავნილებს ჯანსაღ აზრს აცდენილი უწოდა. 

„მერისგან ვიხილეთ გაშვერილი ხელი, რომ თითქოს 2009 წელს შეიცვალა კანონი და ამ კანონის საფუძველზე ერთმანეთთან კავშირში არ არის შენობის ექსპლუატაციაში მიღება და იქ კომუნალური სერვისების შეყვანა. დიახ, ეს ასეა. დიახ, ეს სწორია და დიახ, უმრავლეს ქვეყნებში შენობის ექსპლუატაცია არ არის დაკავშირებული იქ კომუნალური სერვისების შეყვანასთან და ეს სწორია.

2009 წელს გაუქმდა ჯარიმები იმ ადამიანების მიმართ, რომლებიც ექსპლუატაციაში მიუღებელ შენობებში ცხოვრობენ, ასეთი ადამიანი მართლაც ათიათასობით არის თბილისში, განსაკუთრებით დევნილები. ბატონ კალაძეს მინდა ვკითხო, დევნილები, რომლებიც ცხოვრობენ მათ შორის სახელმწიფო საკუთრებაში, რომლებიც ვერ ირეგისტრირებენ საკუთარ ფართს და შესაბამისად ვერ შეჰყავთ კომუნალური სერვისები, ანუ თქვენ ამბობთ, რომ ადამიანს, რომელიც ექსპლუატაციაში მიუღებელ შენობაში გაჭირვების გამო ცხოვრობს, იმას კიდევ ჯარიმა უნდა დააკისრო? ანუ კიდევ უფრო მეტად უნდა გააღარიბო?რატომ ატყუებთ საზოგადოებას? კანონი პრობლემა არ არის, კანონის აღსრულებაა პრობლემა, იმიტომ, რომ ჩვენ ვხედავთ, უკანასკნელ წლებში არც ერთ ასეთ შემთხვევაზე გამოძიებას დამნაშავე არ გამოუვლენია, არც ერთ ასეთ შემთხვევაში ფინანსური კომპენსაცია არც ერთ კომპანიას არ გაუწევია. ეს არის პრობლემა და არა კანონი, რომელიც 2009 წელს მოქალაქეების სასარგებლოდ შეიცვალა. და თუ მაინცდამაინც ეს კანონი არ ვარგოდა, 7 წელია „ქართული ოცნება“ ხელისუფლებაშია, 3 წელი ბატონი ნარმანია მერი იყო და დღეს ენერგეტიკის მარეგულირებელ კომისიაშია ასტრონომიულ ხელფასზე დანიშნული, მასაც შეეძლო თუ მაინც და მაინც ცვლილება იყო საჭირო,“ - განაცხადა გიგი უგულავამ.

მანამდე კალაძემ განმარტა, რომ სწორედ „ნაციონალურმა მოძრაობამ“ განახორციელა კანონში ის ცვლილებები, რომელიც დღეს პრობლემებს ქმნის.

"2009 წელს განახორციელეს ცვლილება და ზუსტად ეს მუხლი საერთოდ ამოიღეს კანონიდან. ანუ, დღეს კანონით ადამიანებს თავისუფლად შეუძლიათ იმ შენობა-ნაგებობებში შესვლა, რომელიც ექსპლუატაციაში არ არის მიღებული. ეს გააკეთა იმ პოლიტიკურმა ჯგუფმა, რომელიც არის ტელეკომპანია „რუსთავი 2“-ის მფლობელი პარტია და დღეს ჩვენ გვდებს ბრალს თითქოს ეს არის კორუფციული სქემა. ამ ხნის განმავლობაში, რაც ეს ცვლილება განხორციელდა, ჩვენ უკვე რეალურად ვხედავთ, რომ ეს არის რეალური პრობლემა, რადგან გვყავს ათიათასობით ოჯახი, ათასობით შენობა-ნაგებობები, რომელიც არ არის ექსპლუატაციაში მიღებული და იქ ჩვეულებრივად წლების განმავლობაში ცხოვრობენ ადამიანები. მათ ამოიღეს კანონიდან ის მნიშვნელოვანი შემაფერხებელი რეგულაციები, რომლითაც იყო განსაზღვრული, რომ ის ქაოტური განაშენიანება და ის პრობლემები, რომელსაც დღეს ვებრძვით, არ მომხდარიყო,"- თქვა კალაძემ.