ცქიტიშვილი ამბობს, რომ რამდენიმე რეგიონში ოლიმპიური აუზები აშენდება

„სამთავრობო საათის” ფარგლებში პარლამენტში რეგიონული განვითარებისა და ინფრასტრუქტურის მინისტრ მაია ცქიტიშვილს უსმენენ. 

"ქუთაისსა და ზუგდიდში იგეგმება ოლიმპიური აუზების მშენებლობა, ხოლო ახალციხეში, ფოთსა და მარნეულში 25-მეტრიანი საცურაო აუზის, მულტიფუნქციური სპორტული კომპლექსების მშენებლობაა დაგეგმილი რუსთავსა და ფოთში, სტადიონების რეაბილიტაცია სამტრედიაში, ხაშურსა და  კასპში, ახალი სტადიონების მშენებლობა ყვარელსა და მარნეულში," - განაცხადა მაია ცქიტიშვილმა პარლამენტის სხდომაზე ,,მინისტრის საათის“ ფარგლებში გამოსვლისას. 

მინისტრმა ხაზი გაუსვა ხელმისაწვდომი სპორტული ინფრასტრუქტურის განვითარების მნიშვნელობას ყველა რეგიონში. 

,,გასულ წელს ჩვენ  დავიწყეთ და წელსაც გაგრძელდება კომპლექსური მშენებლობები სპორტული დარბაზების, საცურაო აუზებისა და სხვა ტიპის სპორტული ინფრასტრუქუტურის მშენებლობა-რეაბილიტაციისთვის,“- აღნიშნა მან.

ამავე ცნობით, 2018 წელს დასრულდა ახმეტისა და სტეფანწმინდას მუნიციპალიტეტებში სპორტული კომპლექსისა და თანამედროვე სტადიონის რეაბილიტაცია-მშენებლობის პროექტები. მოეწყო თანამედროვე ტიპის ინფრასტრუქტურა, რითაც ადგილობრივი ახალგაზრდები შეძლებენ სარგებლობას. ამასთან, რეგიონში განსახორციელებელი პროექტების ფონდიდან 2018 წელს 7 მლნ ₾ ღირებულების პროექტები განხორციელდა მუნიციპალიტეტებში მცირე ზომის სპორტული ინფრასტრუქტურის განვითარებისა და რეაბილიტაციისთვის. 2019 წელს იგივე მიზნებისთვის 5.5 მლნ ლარია გამოყოფილი რეგიონული ფონდიდან.

მაია ცქიტიშვილმა სოფლის მხარდაჭერის პროგრამაზეც ილაპარაკა. 

"მოსახლეობა ჩართული უნდა იყოს გადაწყვეტილების მიღებაში არამხოლოდ მუნიციპალიტეტში, არამედ სოფელში და თემში. წელს აღდგენილმა სოფლის მხარდაჭერის პროგრამამ დაგვანახა, რომ სოფელმა უკეთ იცის რა უნდა,"- თქვა ცქიტიშვილმა.

„მინისტრის საათი“ ახალი ფორმატია, რომელიც პარლამენტის პლენარულ სხდომაზე მთავრობის წევრების სამთავრობო პროგრამის შესრულების შესახებ მოხსენებით გამოსვლას გულისხმობს. “მინისტრის საათის“ ფარგლებში პარლამენტი წლის განმავლობაში ყველა მინისტრს მოუსმენს. მაია ცქიტიშვილი პირველი მინისტრია, რომელიც წინა წელს შესრულებული სამუშაო ანგარიშსა და მიმდინარე წლის ხედვებსა და გეგმებს პარლამენტს ამ ახალი ფორმატში წარუდგენს.