არის თუ არა ზეწოლა. რას ჰყვებიან ბიზნესმენები

საერთაშორისო სავაჭრო პალატის თავმჯდომარე ფადი ასლი, თბილისის მერის, კახა კალაძის განცხადებას ეხმაურება და იმ კომპანიების ჩამონათვალს აქვეყნებს, რომელიც მისივე მტკიცებით, სახელმწიფო სტრუქტურების მიერ მიზანმიმართული ქმედებების საფუძველზე დაზარალდნენ ან გაკოტრდნენ.

"ღირსებისა და გამჭვირვალობისთვის მე ჩამოვთვლი მხოლოდ რამდენიმე მაგალითს იმ კომპანიებისა, რომლებიც დაზარალდნენ ან გაკოტრდნენ სწორედ სახელმწიფო სტრუქტურების მიერ მიზანმიმართული ქმედებების საფუძველზე. ეს სწორედ იმ მცირე კომპანიების ჩამონათვალია, რომელთაც გვერდით ედგათ ICC თავიანთი პრობლემების აღმოსაფხვრელად და მოსალაპარაკებლად სხვადასხვა სახელმწიფო ინსტიტუტებთან.

რა თქმა უნდა, ეს ჩამონათვალი არის მხოლოდ აისბერგის მწვერვალი და მე შემიძლია ამ სიას ათეულობით კომპანიები დავამატო, რომლებიც დაზარალდნენ სახელმწიფოს მხრიდან და რომლებიც დღესაც იმყოფებიან წნეხის ქვეშ - Algorithm LTD, -Iconia Capital, G-Paradise, Philip Morris, British American Tobacco, American Georgian Alloys, Terabank, KazTransGas, InterRao, City Park, Batumi Port, Optical Systems Inc, Samih Habib Investments, Caucasus I Fund, Anka Food Switzerland, Giganti Security Ltd, Lopota Valley Ltd, Chateau Telavi Ltd, Meskhuri Sakhli Ltd, Geoconstruction, Gegmet LTD.

მათივე თავმოყვარეობისა და რეპუტაციის სანდოობის გამო, მოვუწოდებ სახელმწიფო წარმომადგენლებს, თავს ნუ მოიტყუებენ თითქოს ბიზნესები არ არიან წნეხის ქვეშ, თითქოს არ ზარალდებიან, არ ისჯებიან და არ კოტრდებიან მათივე ხელისუფლების მიერ. მოვუწოდებ მათ, რომ სასწრაფოდ შეაჩერონ ეს კრიმინალური ქმედებები “ფრესკოს” ჩათვლით ყველა ბიზნესის მიმართ", - აღნიშნულია ფადი ასლის განცხადებაში.

მანამდე კახა კალაძემ 2012 წლის შემდეგ ბიზნესზე ზეწოლა გამორიცხა.

"თუ ვიღაც კონკრეტული პიროვნება რამეს კანონის საწინააღმდეგოს და არასწორს აკეთებს, შესაბამისი სამსახურები დაინტერესდებიან და ყველას მოეთხოვება, თუ ეს სიმართლეს შეეფერება. რა თქმა უნდა, გამოძიება ობიექტური იქნება",- განაცხადა კახა კალაძემ.

ბიზნესზე ზეწოლის შესახებ განცხადებები თამაზ ელიზბარაშვილმა და ვასილ სოფრომაძემ გაავრცელეს. "ფრესკოს" დამფუძნებელი მთავრობას კადრების გავრცელებით ემუქრება, სადაც მისივე თქმით, ფინანსთა სამინისტროს თანამშრომლები მის მაღაზიებში იპარავენ და იარაღს ატრიალებენ. ამასთან ის ხელისუფლების ბიზნესისადმი მიდგომასაც აკრიტიკებს. მთავრობას ბანდიტებს უწოდებს თამაზ ელიზბარაშვილი.

თამაზ ელიზბარაშვილის და  ვასილ სოფრომაძის მიმართვას კრიტიკული გამოხმაურება მოჰყვა ბიზნესმენთა ნაწილის მხრიდან. სოციალური ქსელით ვრცელი განცხადება გამოაქვეყნა ირაკლი იაშვილმა. ბიზნესმენმა "ნაციონალური მოძრაობის" ბიზნესისადმი დამოკიდებულება გაიხსენა.   

"2004-2012 წლებში ვიდექი ციხის კარებთან (ოჯახის წევრის პატიმრობის გამო), კომპანიები კი, ჯვარზე გაკრული იყო ამ სიტყვის სრული მნიშვნელობით. ამ სიტუაციაში არა თუ წყალი მოუწოდებია ვინმეს ჩემთვის, არამედ ნუგეშის SMS-იც კი არ გამოუგზავნიათ. ეშინოდათ და იმიტომ! და არც არავისთვის მითხოვია ამის გაკეთება, რადგანაც ასეთი საქციელი გმირობის ტოლფასი იყო მაშინ“, - აცხადებს ბიზნესმენი.

პრემიერმინისტრს, როგორც მან ბრიფინგზე განაცხადა, ბიზნესმენების ეს მიმართვები არ ჰქონდა მოსმენილი, თუმცა კითხვის საპასუხოდ აღნიშნა, რომ თითქოს იარაღით მიდიან ბიზნესმენებთან ფინანსთა სამინისტროს წარმომადგენლები, მძიმე ბრალდებაა. "ეს ან უნდა დაადასტურონ, ან ცრუ ბრალდებისთვის პასუხი უნდა აგონ,-განაცხადა მთავრობის ხელმძღვანელმა.

ბიზნესომბუდსმენ ირაკლი ლექვინაძის თქმით, პოლიტიკოსები საკუთარი შეფასებებით და განცხადებებით არ უნდა უშლიდნენ ხელს ბიზნესმენებს, აკეთონ თავიანთი საქმე და მათი საქმიანობა პოლიტიკური სპეკულაციების საგნად არ უნდა აქციონ.

„შემიძლია გესაუბროთ  ბევრ პრობლემურ საკითხზე, რომელიც დღეს ბიზნესს აწუხებს, თუმცა  ქვეყანაში ტოტალურ ბიზნესტერორზე საუბარი უსაფუძვლოა. მზად ვართ, ყველა ბიზნეს პრობლემაზე ვიმუშაოთ. სულ მცირე, გვქონდეს ჩვენი აქტიური პოზიცია და მაქსიმუმ, ვიმოქმედოთ ჩვენს ხელთ არსებული ყველა მექანიზმით მათ მხარდასაჭერად“, – განაცხადა ბიზნესომბუდსმენმა.

ამასთან, ლექვინაძის თქმით, ბიზნესომბუდსმენის აპარატმა 2018 წელს 365 საქმეზე იმუშავა და 65 პროცენტში მოახერხა, რომ სახელმწიფო უწყებებმა კერძო სექტორის ინტერესი გაითვალისწინეს.