ამირან გამყრელიძე: კორონავირუსის გამო რამდენიმე ქვეყანამ პანდემიური მზადყოფნის გაძლიერების შესახებ განაცხადა

რამდენიმე ქვეყანამ, მათ შორის აშშ-მა, პანდემიური მზადყოფნის გაძლიერების შესახებ განაცხადა, - ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა, ამირან გამყრელიძემ დღეს გამართულ ბრიფინგზე განაცხადა. 

მისივე თქმით, ეს ნიშნავს იმას, რომ ამერიკის შეერთებული შტატები პანდემიური მზადყოფნის გეგმაზე საუბრობს. გამყრელიძის განმარტებით, აქვს ასევე ინფორმაცია, რომ მიმდინარე კვირაში ჯანმრთელობის მსოფლიო ორგანიზაციის საგანგებო კომიტეტი კორონავირუსის გავრცელებასთან დაკავშირებით იმსჯელებს.

ამირან გამყრელიძემ კორონავირუსის გავრცელების შესახებ ბოლო სტატისტიკა წარმოადგინა. „ბოლო ორი კვირის განმავლობაში გვაქვს შემთხვევების კლება. დინამიკა ქვევით მოდის, თუმცა ახალი შემთხვევების რაოდენობა ყოველდღიურად რამდენიმე ასეულს შეადგენს. დღევანდელი დილის მონაცემებით, ახალი შემთხვევების რაოდენობა შეადგენს 409-ს სრულად ჩინეთში და საერთო დადასტურებული რაოდენობათა რიცხვი ჩინეთში არის 77 150. ამავე დროს, სამწუხაროდ, ჩინეთში 2443 გარდაცვალების შემთხვევაა. მეორე მხრივ დამაიმედებელია ის, რომ 24 700-მდე ადამიანი ამ ვირუსისგან გამოჯანმრთელდა. მოგეხსენებათ, ვირუსი გასცდა ჩინეთის საზღვრებს და მსოფლიოში, გუშინდელი მონაცემებით, 1800-მდე შემთხვევაა დაფიქსირებული. მათ შორის, ყველაზე მეტი შემთხვევა სამხრეთ კორეაშია. შემდეგ მოდის იაპონია, სინგაპური, იტალია, ირანი და ასე შემდეგ. კორონავირუსული ინფექცია სულ 29 ქვეყანაშია დაფიქსირებული და მათგან 18 გარდაიცვალა", - აღნიშნა გამყრელიძემ. 

საქართველო კვლავ ე.წ. მწვანე ზონაში რჩება, რაც იმას ნიშნავს, რომ ვირუსის გავრცელების რისკი დაბალია.

ქვეყანამ პრევენციის მიზნით ჩინეთთან პირდაპირი ფრენები შეწყვიტა. ვირუსის ირანში გავრცელების შემდეგ კი, 23 თებერვალს, ამ ქვეყნიდან საქართველოში და პირიქით, ფიზიკური პირების გადაადგილება შეიზღუდა. 

ასევე, არ გამორიცხავენ მეზობელ ქვეყნებთან სახმელეთო საზღვარზე გადაადგილების შეზღუდვას. 

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. 

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს. საქართველოში ვირუსის გავრცელების შანსი მინიმალურია.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.