თენგიზ ცერცვაძე: კორონავირუსის შემთხვევების 1-2% სიმპტომების გარეშე, 80% კი მსუბუქად ან საშუალო სიმძიმით მიმდინარეობს

მიუხედავად იმისა, რომ ამ დაავადებამ მრისხანე იმიჯი შეიძინა, მისი შემთხვევების 1-2% საერთოდ სიმპტომების გარეშე მიმდინარეობს, რაც მედიცინისთვის ცალკე თავსატეხია. დაახლოებით 80% მიმდინარეობს მსუბუქად ან საშუალო სიმძიმით, მხოლოდ 15% - მძიმედ, 5% კი ძალიან მძიმედ, - ამის შესახებ გადაცემაში „არენა“ ინფექციური საავადმყოფოს გენერალურმა დირექტორმა, თენგიზ ცერცვაძემ განაცხადა.

„კორონავირუსის სიმპტომები არ განსხვავდება სხვა მწვავე რესპირაციული ინფექციების სიმპტომებისგან. ეს არის ტემპერატურის მომატება, ხველა, ყელის ტკივილი, ცხვირში გაჭედვის შეგრძნება, სისუსტე და სხვა. იშვიათია თავის ტკივილი, ძალიან იშვიათია სისხლიანი ნახველი და დიარეა. მიუხედავად იმისა, რომ ამ დაავადებამ მრისხანე იმიჯი შეიძინა, მისი შემთხვევების 1-2% საერთოდ სიმპტომების გარეშე მიმდინარეობს, რაც მედიცინისთვის ცალკე თავსატეხია. დაახლოებით 80% მიმდინარეობს მსუბუქად ან საშუალო სიმძიმით, მხოლოდ 15% - მძიმედ, 5% კი ძალიან მძიმედ. ხშირად ისმის კითხვები, თუ შევამჩნიეთ ასეთი სიმპტომები, რომლებსაც ყოველ სეზონზე ათასობით მოქალაქე უჩივის, ვის უნდა მივმართოთ? მათ უნდა მიმართონ ოჯახის ექიმებს და ზოგადი პრაქტიკის ექიმთან. მხოლოდ განსაკუთრებულ შემთხვევებში უნდა მივმართოთ სასწრაფო დახმარებას, წინააღდეგ შემთხვევაში სასწრაფო სამსახური გადაიტვირთება და ვერ გაუწევს მომსახურებას მათ, ვინც ამას ნამდვილად საჭიროებს. თავის მხრივ, ოჯახის ექიმები და ზოგადი პრაქტიკის ექიმები გვეკითხებიან, როგორ უნდა მოიქცნენ ასეთ პაციენტებთან? ისე, როგორც კორონავირუსის გამოჩენამდე იქცეოდნენ, თუ რისკის ფონზე ყველა პაციენტი გადაამისამართონ სპეციალიზებულ დაწესებულებებში? ჩვენ გვაქვს ძალიან მკაფიო და ერთმნიშვნელოვანი რეკომენდაცია: თუ პაციენტს ანამნეზში არ აღენიშნება ის კრიტერიუმები, რომლებზეც ჯანმო და ჩვენი ჯანდაცვის სამინისტრო საუბრობს, ის აუცილებლად დაიტოვეთ და თქვენვე უმკურნალეთ“, - აცხადებს ცერცვაძე.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.