თენგიზ ცერცვაძე: საკმარისია, ხმა ამოვიღოთ პანდემიის წარმატებით მართვაზე, რომ ვაი ტელევიზიები და ექსპერტები ისე შეიცხადებენ, გეგონებათ, ტაბუდადებულ თემას შევეხეთ

საკმარისია, ხმა ამოვიღოთ ქვეყანაში „კოვიდ-19“-ის პანდემიის წარმატებით მართვაზე და/ან რომელიმე ქვეყანას შევედაროთ, რომ ვაი ტელევიზიები და ვაი ექსპერტები ისე შეიცხადებენ, გეგონებათ, რაიმე ტაბუდადებულ თემას შევეხეთ და მკრეხელობა ჩავიდინეთ. ყველანაირად ცდილობენ, მოსახლეობა დაარწმუნონ, რომ „ლუზერები“ ვართ, - ამის შესახებ თბილისის ინფექციური საავადმყოფოს დირექტორის, თენგიზ ცერცვაძის განცხადებაშია ნათქვამი, სახელწოდებით „ადამიანებო, იყავით ფხიზლად!“.

„2 მარტს, „ღამის მთავარში“ ეკა კვესიტაძე შეეცადა, მაყურებლები დაერწმუნებინა, რომ „დღეის შემდეგ მათთვის ახლობელი თითოეული ადამიანის „კოვიდ-19“-ით გარდაცვალება ხელისუფლების ბრალია და არა კორონავირუსის?!“ მანვე განაცხადა, რომ იმ ქვეყნებში, სადაც ვაქცინაცია დიდი ხანია, დაიწყეს, „კოვიდ-19“-ის ახალი შემთხვევები დრამატულად არის შემცირებული (დიდი ტყუილი), ხოლო ლოკდაუნები მოხსნილია (კიდევ ერთი ტყუილი), ამავე დროს „ტვ პირველმა“ განათავსა ჯანდაცვის მინისტრის ფოტოები წარწერით, რომ ბოლო 24 საათში 10 გარდაცვლილი არის შეუსრულებელი დაპირების საფასური?! და ადამიანების სიცოცხლით თამაში. ეს არის უპრეცედენტო დემაგოგიისა და უზნეობის მაგალითი ამ ტელევიზიების მხრიდან.

სადმე გინახავთ, ან მოგისმენიათ, რომ მსოფლიოს რომელიმე ტელევიზიას მსგავსი განცხადება გაეკეთებინოს? რა, 2 მარტს რომ ვაქცინა შემოგვეტანა, იმ დღეს ის 12 ავადმყოფი აღარ მოკვდებოდა? მე კარგად ვიცნობ ამ ტელევიზიებს, მაგრამ არ მეგონა, იმ დონემდე თუ დაეშვებოდნენ, რომ გარდაცვლილი ადამიანებით მანიპულირებას და სპეკულირებას გაბედავდნენ. მინდა, მივმართო საზოგადოებას იულიუს ფუჩიკის სიტყვებით, რომლითაც იგი მსოფლიოს ფაშიზმის მოახლოების საფრთხეზე აფრთხილებდა „ადამიანებო, იყავით ფხიზლად!“.

ახლა ვნახოთ, როგორია სინამდვილე: ზუსტად იმავე 2 მარტს, როცა საქართველოში „კოვიდ-19“-ით 12 ავადმყოფი გარდაიცვალა, ისრაელში გარდაიცვალა 30 ავადმყოფი, ბრიტანეთში – 343, გერმანიაში – 401, აშშ-ში – 1989 ავადმყოფი და ა.შ. გამოდის, რომ ამ ქვეყნებისა და კიდევ სხვა ძალიან ბევრი ქვეყნის ხელმძღვანელები მკვლელები არიან და უნდა გასამართლდნენ? რაც შეეხება „კოვიდ-19“-ის ახალი შემთხვევების ვითომდა დრამატულად შემცირებას, ბოლო ერთი კვირის განმავლობაში საქართველოში სტაბილურად ფიქსირდება „კოვიდ-19“-ით 400-ზე ნაკლები ახალი შემთხვევა, მაშინ, როდესაც ისრაელში – 3 000-დან 5 000-მდე ახალი შემთხვევა, ბრიტანეთში – 6 000-დან 7 000-მდე ახალი შემთხვევა, გერმანიაში – 6 000-დან 11 000-მდე ახალი შემთხვევა, აშშ-ში – 55 000-დან 69 000-მდე ახალი შემთხვევა და ა.შ. რაც შეეხება შეზღუდვებს და ლოკდაუნებს, ისინი ამერიკისა და ევროპის პრაქტიკულად ყველა ქვეყანაში გაცილებით უფრო მკაცრია, ვიდრე საქართველოში. ხოლო ჩვენი ქვეყნის ხელმძღვანელობასა და ჯანდაცვის მინისტრს, გმირ ექიმებთან ერთად, მხოლოდ მადლობა ეკუთვნით იმისთვის, რომ გაცილებით მწირი რესურსებითა და ვაქცინის გარეშეც კი მოახერხეს ახალი შემთხვევების და განსაკუთრებით გარდაცვალების შემთხვევების მინიმიზაცია და გადაარჩინეს ათასობით უმძიმესი ავადმყოფის სიცოცხლე, რაც იმედს იძლევა, რომ ქვეყანაში ვაქცინის შემოტანის შემდეგ (სავარაუდოდ მარტის მეორე ნახევარში) „კოვიდ-19“-ის ეპიდსიტუაცია კიდევ უფრო მეტად გაუმჯობესდება.

4 მარტს „მთავარმა არხმა“ გადაცემა „მთავარში“ გაუშვა სიუჟეტი, სადაც ჯერ გამოიგონა, რომ „ცერცვაძე ვაქცინაციის ეფექტიანობას ეჭვის ქვეშ აყენებს?! (ცხადია, მსგავსი არსად არაფერი მითქვამს). ხოლო შემდეგ „ნაციონალური მოძრაობის“ ახლად მოვლენილ სახეს, გიორგი ჩალაძეს ათქმევინა, რომ მე ფსიქიკური პრობლემები მაქვს?! დიახ, ჩალაძე და კვესიტაძე თვლიან, რომ მე ფსიქიკური პრობლემები მაქვს. როგორ მოგწონთ? ადრე ჩალაძე ჩემს ციხეში ჩასმასაც ითხოვდა, რადგან ყელში ვყავართ გაჩხერილი და ხელს ვუშლი, რომ ქვეყანაში აპოკალიფსის სურათი დახატონ. ერთი სული აქვთ, რომ ქვეყანაში ბევრი „კოვიდ-19“-ით ინფიცირებული და ბევრი გარდაცვლილი იყოს, რომ ხალხი ქვეყნის ხელმძღვანელობის წინააღმდეგ აამხედრონ. სხვათა შორის, ეს ის ჩალაძეა, რომელიც ერთი კვირაა, ატყუებს მოსახლეობას, რომ მას შეუძლია, დღესვე შემოიტანოს ქვეყანაში ვაქცინის ერთი მილიონი დოზა?! მაგრამ მთავრობა ამის ნებას არ აძლევს?! მე ვურჩევ ტელემაყურებლებს, ყურადღებით ადევნონ თვალი ჩალაძის პერსონას, რათა იცოდნენ თუ რა ტიპის ადამიანები შეიძლება მოვიდნენ ხელისუფლებაში, თუ ისინი სწორ არჩევანს არ გააკეთებენ. „ადამიანებო, იყავით ფხიზლად!“.

რაც შეეხება სიმართლეს, ყველამ იცის, რომ მე „კოვიდ-19“-ის ვაქცინაციის ერთ-ერთი ყველაზე აქტიური მხარდამჭერი ვარ და ჩემი ეს პოზიცია ათეულობით ტელეინტერვიუში და პოსტში მაქვს დაფიქსირებული. ხოლო იმას, რომ ვაქცინა პანდემიასთან ბრძოლის ერთადერთი საშუალება ვერ იქნება, მთელი მსოფლიო აღიარებს. ცოტა ხნის წინ ეს თავის გამოსვლაში ჯანმოს გენერალურმა დირექტორმაც დაადასტურა. ასე რომ არ იყოს, ევროპისა და ამერიკის ყველა ქვეყანაში, ისევე, როგორც ისრაელში, აღარ იქნებოდა საჭირო ლოკდაუნები და მკაცრი შეზღუდვები, არ იქნებოდა სავალდებულო პირბადეების ტარება და სოციალური დისტანცირება. მილიონები და მილიარდები არ დაიხარჯებოდა „კოვიდ-19“-ის საწინააღმდეგო პირდაპირი მოქმედების ანტივირუსული მედიკამენტის შექმნაზე და ა.შ.

კიდევ ერთი რამ. საკმარისია, ხმა ამოვიღოთ ქვეყანაში „კოვიდ-19“-ის პანდემიის წარმატებით მართვაზე და/ან რომელიმე ქვეყანას შევედაროთ, რომ ეს ვაი ტელევიზიები და ვაი ექსპერტები ისე შეიცხადებენ, გეგონებათ, რაიმე ტაბუდადებულ თემას შევეხეთ და მკრეხელობა ჩავიდინეთ. მიზეზი – როგორ შეიძლება ქვეყნის დღევანდელი ხელმძღვანელობის პირობებში ქვეყანაში რაიმე კარგი და წარმატებული ხდებოდეს. მაშინ რევოლუციური მუხტი საიდან მოვიტანოთ? ისინი ყველანაირად ცდილობენ, მოსახლეობა დაარწმუნონ, რომ „ლუზერები“ ვართ.

გასაგებია, რომ ევროპისა და ამერიკის ქვეყნები ეკონომიკურად ჩვენზე ბევრად ძლიერები არიან და მთლიანობაში ბევრად ძლიერი ჯანდაცვის სისტემაც აქვთ, მაგრამ ეს სულაც არ გამორიცხავს, რომ ცალკეულ სეგმენტებში ჩვენ უფრო წარმატებულები ვიყოთ. ასე მაგალითად, მოსწონს ეს ვინმეს თუ არა, ფაქტია, რომ საქართველოს აქვს ევროპის 45 ქვეყანაზე დაბალი კოვიდსიკვდილობის პროცენტი (ე.წ. CFR) და ევროპისა და ამერიკის ქვეყნებს შორის ჰოსპიტალს გარეთ (ბინაზე, კოვიდსასტუმროში) გარდაცვლილთა ძალიან დაბალი რიცხვი (სულ 41 შემთხვევა). მაშინ, როდესაც ევროპისა და ამერიკის სხვა ქვეყნებში ჰოსპიტალს გარეთ ასობით და ათასობით „კოვიდ-19“-ით ავადმყოფია გარდაცვლილი. ეს ძალიან სერიოზული მაჩვენებელია იმის დასტურად, რომ საქართველოში „კოვიდ-19“-ით პაციენტების ნაკადები კარგად იმართება. ისიც ხომ ფაქტია, რომ ამერიკის CDC-იმ, კომპანია Gilead-მა და მსოფლიო ჰეპატოლოგიის ლიდერებმა C ჰეპატიტის ელიმინაციის მსოფლიოში პირველ სამოდელო ქვეყნად სწორედ საქართველო აირჩიეს და არა შვედეთი, გერმანია, ავსტრია, ისრაელი ან აშშ. ისიც ფაქტია, რომ საქართველო ძალიან დიდი ალბათობით იქნება მსოფლიოში პირველი ქვეყანა, რომელიც 2025 წლისთვის დაამარცხებს 21-ე საუკუნის ორ მთავარ გამოწვევას: C ჰეპატიტს და აივ/შიდსს.

ასე, რომ ჩემო თანამემამულეებო! იყავით ფხიზლად, მაგრამ იმედიანად!“, - წერს თენგიზ ცერცვაძე.