თეა წულუკიანი: ჩვენ ვერ დავუშვებთ ციხეში კორონავირუსის იმპორტს

ყველა პატიმარს, ათიათს ადამიანს მივმართავ და ვეუბნები, რომ იყავით მშვიდად. რომ არ იყოს სიმშვიდის საფუძველი, მე ვიქნებოდი პირველი, თქვენთან მოვიდოდი და ამაზე ვისაუბრებდი, - ამის შესახებ იუსტიციის მინისტრმა თეა წულუკიანმა ტელეკომპანია „იმედის“ გადაცემა „ქრონიკის“ ეთერში განაცხადა.

მისი თქმით, უწყების მიზანია, რომ პატიმრები იყვნენ დაცული და გარედან შემავალი ადამიანების ოდენობა მინიმუმამდე იყოს დაყვანილი.

„დღეს არის ყველა საფუძველი იმისთვის, რომ ვიყოთ მშვიდად და მობილიზებულები. ავიტანოთ ცოტა ხანი მშვიდად, რომ პაემნები აღარ არის. ორშაბათიდან ჩავრთავთ ახალ შესაძლებლობას. ეს არის უფასო სასაუბრო წუთები, რაც ნაწილობრივ დააკომპენსირებს პაემნების შეუძლებლობას“, - აღნიშნა წულუკიანმა.

მინისტრის თქმით, პენიტენციურ სისტემაში არის მედიკამენტების სრული მარაგი. „დარიგდა 100 ათასი ლარის ღირებულების მედიკამენტები. მიწოდებაში წყვეტა არ არის. არ არსებობს საფუძველი იმისა, რომ შეწყდება წამლის მოწოდება. შესაბამისად, საჭიროა სიმშვიდე. ერთადერთი, რაც პატიმრებმა უნდა იცოდნენ, მე მკაცრ კრიტერიუმებს ვუდგენ პენიტენციურ სისტემაში მომუშავე თანამშრომლებს. მათ უნდა იცოდნენ, რომ დღეს მთავარია პატიმარი და მისი სიცოცხლე. კერძოდ, ზოგიერთი თანამშრომელი, რომელიც მუშაობდა სამოქალქო კლინიკებში, სადაც დაფიქსირებულია შემთხვევები, დროებით ციხეში ვეღარ შევა ან აღარ იმუშავებს ჩვენთან, რადგან ჩვენ ვერ დავუშვებთ ციხეში კორონავირუსის იმპორტს“, - განაცხადა წულუკიანმა.

მისი თქმთ, ამ დროისთვის მთელ პენიტენციურ სისტემაში არ არსებობს კორონავირუსთან დაკავშირებული არც ერთი საეჭვო შემთხვევა.

„მიმღებ ციხეებში გახსნილია პერიმეტრის გარეთ დროებითი შენობები, სადაც ახალ პატიმრებს ვამოწმებთ. ყველა ახალშემოსული პატიმარი თავსდება ცალკე, თუკი არ არის საეჭვო შემთხვევა პირველი სამი კვირის განმავლობაში ძველ პატიმრებში არ ირევა; თუკი არის საეჭვო, სიცხიანი პატიმარი ციხეში ვერ შედის და მიემართება პირდაპირ სამოქალაქო კლინიკაში“, - განაცხადა თეა წულუკიანმა.

იუსტიციის მინისტრმა ასევე სპეციალური განცხადება გააკეთა პატიმარი ქალებისთვის, რომლებსაც გარეთ ჰყავთ შვილები.

„მინდა მივმართო დედებს,რომლებიც არიან საპატიმროებში, მთავარია თქვენ იზრუნოთ ჩვენთან ერთად საკუთარ ჯანმრთელობაზე, საკუთარ ემოციურ მდგომარეობაზე, თქვენი შვილების ჯანმრთელობაზე ზრუნავს სახელმწიფო. მთავარი საზრუნავი არის ის, რომ გარეთ ვირუსი არ გავრცელდეს და ყველა ვიყოთ მკაცრი რეჟიმის პირობებში, რათა ერთმანეთს არ გადავდოთ რამე, რაც შემდეგ შეიძლება იყოს კორონავირუსი“, - განაცხადა თეა წულუკიანმა.

12 მარტს პენიტენციური სამსახურის გენერალურმა დირექტორმა ორკვირიანი სპეციალური პირობების მდგომარეობა გამოაცხადა.