როგორ მკურნალობენ საქართველოში კორონავირუსის მსუბუქ და მძიმე შემთხვევებს

პაციენტების 80%-ში კორონავირუსი მსუბუქად მიმდინარეობს და მათ სერიოზული მკურნალობა არ სჭირდებათ, - ამის შესახებ შიდსისა და კლინიკური იმუნოლოგიის სამეცნიერო ცენტრის ცხელმძღვანელმა, თენგიზ ცერცვაძემ „ტვ პირველის“ ეთერში განაცხადა.

მისი თქმით, ასეთ დროს პაციენტს სიმპტომურად მკურნალობენ, რომ მდგომარეობა შეუმსუბუქონ და სიცხის დამწევს აძლევენ.

„კორონავირუსის შემთხვევების 1% მიდის უსიმპტომოდ, თუ შემთხვევით არ დაარეგისტრირა ლაბორატორიამ. დაავადების 80% მიდის მსუბუქად. 15% მიდის მძიმედ, რაც იმას ნიშნავს, რომ მათ აქვთ ორმხრივი მძიმე პნევმონია. დაახლოებით 5% მიდის კრიტიკულად მძიმედ, რომელიც საჭიროებს გადაუდებელი თერაპიის ზომებს, წინააღმდეგ შემთხვევაში ის შეიძლება დამთავრდეს ლეტალურად. უსიმპტომოებს ცხადია მკურნალობა არ უნდათ. იმ 80%-ში, რომლებშიც მსუბუქად მიდის, მათაც სერიოზული მკურნალობა არ სჭირდებათ. ვცდილობთ, რაღაც შევუმსუბუქოთ და სიცხის დამწევი მივცეთ. მძიმე და კრიტიკულ შემთხვევებს აუცილებლად სჭირდება მკურნალობა“, - აღნიშნა თენგიზ ცერცვაძემ.

რაც შეეხება რთული შემთხვევების სამკურნალო პრეპარატებს, მისი თქმით, კორონავირუსის ოფიციალურად დადასტურებული სპეციფიკური მკურნალობა არ არსებობს.

„არსებობს წინასწარი მონაცემები დიდ ჯგუფზე დაკვირვების და კომპეტენტური ავტორების, ჩინელების, რომ გარკვეული მედიკამენტები შესაძლოა იყოს ეფექტური კორონავირუსის ინფექციის დროს. ჩვენ არაფერს ვკარგავთ. თითოეული ეს მედიკამენტი აბსოლუტურად უსაფრთხოა ორგანიზმისთვის. ის გამოიყენებოდა შიდსისა და რევმატიული ართრიტის დროს. ეს მედიკამენტები გამოცდილია ადამიანებზე და არავითარ ექსპერიმენტს არ ვატარებთ. მივდივართ ასეთი გზით. თუ ჩინელები მართალი არიან და ეს მედიკამენტი უხდება, ხომ კარგი, თუ არადა არაფერს დაუშავებს“, - განაცხადა თენგიზ ცერცვაძემ.

მისივე თქმით, ჩინელების დასკვნით, ყველაზე კარგი პრეპარატი დელაგინია და საქართველო ამ მედიკამენტს უკვე იყენებს. ცერცვაძის განმარტებით, ჯერჯერობით კორონავირუსთან ბრძოლის ყველაზე დიდი გამოცდილება ჩინეთსა და იტალიას აქვთ და ისინი იყენებენ 5-6 მედიკამენტს, რომელთაგან, ერთის გარდა, რომელზეც პროფესორი ფაუჩი ლაპარაკობდა, ყველა ცნობილი მედიკამენტია. თენგიც ცერცვაძის თქმით, ამ მედიკამენტებს, სხვადასხვა დაავადებების დროს იყენებდნენ, მაგალითად რამდენიმე მედიკამენტი შიდსის სამკურნალოდ გამოიყენებოდა.

„ზოგიერთი წამალი, მაგალითად რიბავერინი და ინტერფერონი, გამოიყენებოდა C ჰეპატიტის სამკურნალოდ. დელაგილი და პლატიფილინი, ეს ორი პრეპარატი მსგავსი ნივთიერებებია და ესენი ჯერ კიდევ ჩემ ახალგაზრდობაში ფართოდ გამოიყენებოდა რევმატული და ავტოიმუნური დაავადებების საწინააღმდეგოდ. ასე ბრმად კი არ აიღეს ეს 5-6 პრეპარატი, განიხილეს და ჩათვალეს, რომ ის შესაძლოა, სასარგებლო ყოფილიყო. ჩინელებთან და სხვებთანაც მუდმივ კონტაქტზე ვართ და ჩინელების დასკვნით, ამ პრეპარატებიდან არც ერთი არ აღმოჩნდა ისეთი, რომელზეც შეიძლება პირდაპირ ვთქვათ, რომ უკვე ნაპოვნია პირდაპირი ანტივირუსული მოქმედების მედიკამენტი. არც ერთ მათგანს ჯერჯერობით არ აქვს ოფიციალური რეკომენდაცია, მაგრამ ექვსივე პრეპარატი გამოიყენება კორონავირუსის სამკურნალოდ“, - აღნიშნა თენგიზ ცერცვაძემ.

ამ დროისთვის საქართველოში კორონავირუსის 33 შემთხვევაა დადასტურებული. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.