ენტონი ფაუჩი: საკარანტინო ზომები არ ნიშნავს, რომ 15 დღის შემდეგ ვირუსი გაქრება, ეს ნიშნავს, რომ ჩვენ ხელახლა შევაფასებთ, გამოიღო თუ არა შედეგი ამ ზომებმა

სოციალური ქსელ Facebook-ის დამფუძნებელმა, მარკ ცუკერბერგმა ინტერვიუ ჩაწერა ალერგიისა და ინფექციური დაავადებების ეროვნული ინსტიტუტის ხელმძღვანელთან, ენტონი ფაუჩისთან, რომელშიც კორონავირუსის ეპიდემიაზე ისაუბრეს. ვიდეო ცუკერბერგმა facebook-ზე გამოაქვეყნა.

ენტონი ფაუჩის განცხადხებით, ახალგაზრდები არ შედიან იმ ჯგუფში, რომლებიც სერიოზულად შეიძლება დაავადდნენ კორონავირუსით, თუმცა შეუძლიათ დაინფიცირდნენ და ხანდაზმული ასაკის ხალხს გადასდონ ვირუსი, რომლებიც ამ დაავადებიდან გარდაცვალების რისკ-ჯგუფში შედიან.

„თუნდაც მინიმალური სიმპტომები ჰქონდეთ, ან სულაც არ ჰქონდეთ სიმპტომები, ისინი ვირუსის მოწყვლად ჯგუფზე გადადების ვექტორი ხდებიან“, - განაცხადა ინტერვიუში ენტონი ფაუჩიმ.

აღსანიშნავია, რომ 16 მარტს თეთრმა სახლმა, ამერიკის მოქალაქეებს ურჩია კორონავირუსის გავრცელების შეკავების მიზნით, 15 დღის განმავლობაში, თავი აარიდონ საზოგადოებრივ შეკრებებსა და რესტორნებში სიარულს.

„ეს არ ნიშნავს, რომ 15 დღის შემდეგ ვირუსი გაქრება. ეს ნიშნავს, რომ 15 დღის შემდეგ, ჩვენ ხელახლა შევაფასებთ და ვნახავთ გამოიღო თუ არა შედეგი იმან, რაც განვახორციელეთ“, - აღნიშნა ალერგიისა და ინფექციური დაავადებების ეროვნული ინსტიტუტის ხელმძღვანელმა.

ენტონი ფაუჩიმ ისაუბრა კორონავირუსის წინააღმდეგ ვაქცინის შექმნაზე. მისი განმარტებით, ვაქცინის შექმნა კლინიკური ტესტირების ბევრ სტადიას მოიცავს, რის გამოც 1-1.5 წელი დასჭირდება უსაფრთხო ვაქცინის შემუშავებას.

მისივე თქმით, არ არსებობს ტესტი, რომელიც გეტყვით, რომ ხელმეორედ არ დაინფიცირდებით, თუმცა მისი აზრით, იმუნური სისტემის რეაგირება ამ ვირუსზე არ განსხვავდება ნებისმიერ სხვა ვირუსზე რეაგირებისგან.

ენტონი ფაუჩიმ ასევე იმედი გამოთქვა, რომ კორონავირუსის რეაქცია სოციალურ დისტანცირებაზე ისეთი იქნება, როგორც მძიმე მწვავე რესპირატორული სინდრომის დროს.

„რისი ხილვაც მსურს არის ის, რაც მძიმე მწვავე რესპირატორული სინდრომის დროს მოხდა. როდესაც ჯანდაცვის სისტემის მიერ გატარებულმა ზომებმა არსებითად ჩაახშო ის. ის გაქრა და არასდროს დაბრუნებულა“, - დასძინა მან.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.