ლევან გოფოძე: „ემერჯენს ცენტრის“ შექმნა რესპუბლიკური საავადმყოფოს, როგორც კლინიკის ფუნქციონირებას ვერ შეაფერხებს

რესპუბლიკური საავადმყოფოს დირექტორის, ლევან გოფოძის განცხადებით, სამკურნალო დაწესებულებაში „ემერჯენს ცენტრის“ შექმნა საავადმყოფოს, როგორც კლინიკის ფუნქციონირებას, ვერ შეაფერხებს.

მისივე თქმით, ინტენსიურად უნდა იმუშაოს ცხელმა ხაზმა, რათა რესპუბლიკურ საავადმყოფოში მოხვდნენ მხოლოდ ის პაციენტები, რომლებსაც აღენიშნებათ მაღალი ცხელება და სხვა სიმპტომები, და ეს ნაკადი სწორედ ცხელმა ხაზმა უნდა დაარეგულიროს

„რესპუბლიკურ საავადმყოფოს აქვს გადაუდებელ სიტუაციაში მუშაობის გამორჩეული ტრადიცია და არაა გასაკვირი, რომ პაციენტების მიღების ცენტრად სწორედ ჩვენი საავადმყოფო აირჩიეს. ამ ეტაპზე ჩვენ მივიღებთ ყველა პაციენტს, რომელსაც აღენიშნება სიმპტომები ან ცხელება, რაც იქნება მიმართვიანობის ძირითადი მიზეზი. ჩვენ ვამზადებთ კლინიკას და ხვალ დილიდან აქტიურად ჩავერთვებით პროცესში და ყველა პაციენტი მიიღებს სათანადო მომსახურებას, თუ საჭირო იქნება, გაივლის ტესტირებას და შემდეგში გადავა ამა თუ იმ სამკურნალო დაწესებულებაში. რაც შეეხება ასაკობრივ ზღვარს, ჩვენ არ მივიღებთ მხოლოდ პატარა ბავშვებს, იმიტომ რომ მსგავსი დირექტივა ჯერ არაა გაცემული. ყველა სხვა პაციენტს ჩვენ სათანადო მომსახურებას გავუწევთ. რესპუბლიკური საავადმყოფოს როგორც კლინიკის ფუნქციონირება ვერ შეფერხდება, ჩვენ ამჟამადაც დაკვირვების ქვეშ 45 პაციენტი გვყავს. ერთადერთი, რაც გვაძლევს უპირატესობას, არის ჩვენი ე.წ. ემერჯენსის სისტემა, სასწრაფო მიღების დეპარტამენტი, რომელიც მოწოდებულია დიდი რაოდენობის პაციენტების მიღებაზე“, - აცხადებს ლევან გოფოძე

მისივე თქმით, დაავადებათა კონტროლის ცენტრმა და ინფექციონისტებმა არაერთხელ განმარტეს, თუ რა სიმპტომები ახასიათებს კორონავირუსს, ამიტომაც ინტენსიურად უნდა იმუშაოს ცხელმა ხაზმა, რათა რესპუბლიკურ საავადმყოფოში მოხვდნენ მხოლოდ ის პაციენტები, რომლებსაც აღენიშნებათ მაღალი ცხელება და სხვა სიმპტომები, და ეს ნაკადი სწორედ ცხელმა ხაზმა უნდა დაარეგულიროს.

„მას შემდეგ, რაც კორონავირუსის გამო ქვეყანაში სპეციალური ღონისძიებების გატარება დაიწყო, რესპუბლიკური საავადმყოფო ძალიან სწრაფად გადაკეთდა საკარანტინო ზონად. ამჟამად მზად ვართ გავუძლოთ ყველანაირ გამოწვევას, მაგრამ ნაკადების მართვა ძალიან რთული პროცესია და ძალიან მნიშვნელოვანია, რომ მოსახლეობამ ამ პრობლემისადმი სწორი დამოკიდებულება გამოიჩინოს. თუ ადამიანს მაღალ ტემპერატურასთან ერთად აქვს ხველა, ცემინება, მან სასწრაფოდ უნდა მიმართოს რესპუბლიკურ საავადმყოფოს, მაგრამ თუ ტემპერატურა არაა მაღალი და არც სხვა სიმპტომებია სახეზე, მაშინ შესაძლებელია, რომ ასეთმა ადამიანმა პირველ ეტაპზე თავი შეიკავონ კლინიკაში მიმართვისგან“, - განაცხადა გოფოძემ.

20 მარტს ჯანდაცვის სამინისტრომ თბილისში, რესპუბლიკურ საავადმყოფოში „ემერჯენს ცენტრი“ შექმნა.

საქართველოში კორონავირუსი 43 ადამიანს დაუდასტურდა.. მათგან ერთი ინფექციური კლინიკიდან უკვე გაეწერა. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

რა უნდა ვიცოდეთ საგანგებო მდგომარეობის შესახებ, წაიკითხეთ აქ.