დავით ზალკალიანი: უცხოეთში დარჩენილ ასობით ჩვენს თანამემამულეს ვეხმარებით თავშესაფრით და საკვებით

საქართველოს საგარეო საქმეთა მინისტრმა, დავით ზალკალიანმა საზღვარგარეთ მყოფი საქართველოს მოქალაქეების დასახმარებლად საქართველოს დიპლომატიური მისების მიერ გაწეულ საქმიანობაზე ისაუბრა.

დავით ზალკალიანმა აღნიშნა, რომ საქართველოს დიპლომატიური კორპუსი ფრონტის წინა ხაზზე იმყოფება და არსებული შესაძლებლობის ზღვარზე მუშაობს.

მისი თქმით, პრემიერ-მინისტრთან არსებული საკოორდინაციო საბჭოს გადაწყვეტილებით მსოფლიოში COVID-19-ის გავრცელების დღიდან გადაყვანილი არიან მუშაობის საგანეგბო 24-საათიან რეჟიმზე.

„მინდა, მათ განსაკუთრებული მადლიერება დავუდასტურო. მათ უწევთ მოქალაქეებთან ყოველდღიური შეხება, ჩვენ ძალიან შეზღუდული ადამიანური და ფინანსური რესურსები გვაქვს და ამ არსებული რესურსების ფარგლებში მაქსიმალურს ვაკეთებთ, რომ უსახლკაროდ და ულუკმაპუროდ დარჩენილ ჩვენს მოქალაქეებს მნიშვნელოვანი დახმარება გავუწიოთ. ასეულობით ჩვენს მოქალაქეს ვეხმარებით თავშესაფრის მოძიების კუთხით, ყოველდღიური საკევბით მომარაგების კუთხით, ლოჯისტიკური საკითხების მოგვარებაში“, - განაცხადა მინისტრმა.

ზალკალიანმა მადლობა გადაუხადა ასევე საქართველოს საპატიო კონსულებს და კერძო სექტორის წარმომადგენლებს, რომლებიც სამოქალაქო პასუხისმგებლობის მაღალ სტანდარტებს იჩენენ და დახმარებას უწევენ საქართველოს დიპლომატიურ მისიებს, მოქალაქეების ყოველდღიური პრობლემების მოგვარებაში.

მინისტრის განცხადებით, საზღვარგარეთ საქართველოს დიპლომატიური მისიები ასევე აქტიურად მუშაობენ, სხვადასხვა საკითხზე, მათ შორის ქვეყანაში საკამრისი რაოდენობის სამედიცინო ინვენტარის და სხვა სახის პროდუქტების მოზიდვის მიზნით.

მთელ მსოფლიოში მოქმედებს ბევრი შეზღუდვა ამა თუ იმ მედიკამენტებზე, სამედიცინო აღჭურვილობაზე, იგივე ტესტების მომარაგებაზე. მთელი ჩვენი დიპლომატიური კორპუსი არის მობილიზებული და ამ მიმართულებითაც აქტიურად მუშაობს“, - განაცხადა ზალკალიანმა საზოგადოებრივი მაუწყებლის ეთერში.

ზალკალიანმა ასევე აღნიშნა, რომ ევროპელი და ამერიკელი პარტნიორები შექმნილ ვითარებაში არ აკლებენ ყურადღებას საქართველოს, რისი დასტურიც არის აშშ-სა და ევროკავშირის მიერ გამოყოფილი ფინასური დახმარება, კორონავირუსის კრიზისის გამოწვევებთან გასამკლავებლად.

„მინდა, ვისარგებლო შემთვხევით და მადლობა გადავუხადო ევოკავშირის და ამერიკის შეერთებული შტატების ელჩებს საქართველოში, რომლებმაც მნიშვნელოვანი წვლილი შეიტანეს ამ მიმართულებით“, - განაცხადა მინისტრმა.