დავით ზალკალიანი: საზღვარგარეთ ჩვენი მოქალაქეების მდგომარეობას მუდივად ვაკონტროლებთ

საქართველოს მოქალაქე, რომელიც იტალიაში კორონავირუსით დაინფიცირდა, გამოჯანმრთელდა და სამედიცინო დაწესებულება დატოვა. ამის შესახებ „დღის ქრონიკაში“ ჩართვისას საქართველოს საგარეო საქმეთა მინისტრმა, დავით ზალკალიანმა განაცხადა.

მისივე თქმით, ამის შესახებ ინფორმაცია ახლახან მიიღეს. ეს პირი ამჟამად 14-დღიან საკარანტინო პირობებში რჩება. ზალკალიანმა იმედი გამოთქვა, რომ იგი ოჯახს მალე დაუბრუნდება.

„ჩვენ მუდივად ვაკონტროლებთ ჩვენი მოქალაქეების მდგომარეობას. იცით, რომ გვქონდა ერთი შემთხვევა იტალიაში, როდესაც საქართველოს მოქალაქე იყო დაინფიცირებული. მოქალაქე, როგორც კი დაგვიკავშირდა, მას შესაბამისი დახმარება გაუწია საქართველოს საელჩომ. დავაკავშირეთ ის ჯანდაცვის შესაბამის სტრუქტურებთან. ნებისმიერ მოქალაქეს, რომელსაც მსგავსი სახის პრობლემა შეექმენება, ბუნებრივია, იგივე სახის მომსახურეობას გაუწევს ჩვენი საელჩო ნებისმიერ ქვეყანაში. ჩვენ დღეს მივიღეთ სასიხარულო ინფორმაცია სწორედ ამ მოქალაქესთან დაკავშირებით, რომ ის უკვე გამოჯანმრთელდა და გაწერილია საავადმყოფოდან, თუმცა საბოლოო გამოჯანმრთელებამდე მაინც რჩება 14-დღიან საკარანტინო პირობებში და დარწმუნებული ვარ, უახლოეს პერიოდში ჯანმრთელი დაუბრუნდება საკუთარ ოჯახს“, - განაცხადა ზალკალიანმა.

მინისტრმა ასევე ისაუბრა საქართველოს ხელისუფლების მიერ იტალიიდან საფაერო რეისით გამოყვანილ მოქალაეებზე. მისივე თქმით, ორი საჰაერო რეისით სულ 164 საქართველოს მოქალაქე გამოიყვანეს იტალიიდან.

მინისტრის განცხადებით, საქართველოს საელჩომ რომში მოახდინა ყველა იმ ადამიანის იდენტიფიცირება, რომლებსაც იმ პერიოდში უახლოესი ორი კვირის განმავლობაში ბილეთები ჰქონდათ დაჯავშნილი. ყველა მათგანი დღეს შესაბამის საკარანტინო თუ სამკურნალო პირობებში იმყოფება.

საქართველოში კორონავირუსით ინფიცირებულთა რიცხვი 25-მდე გაიზარდა.

კორონავირუსით ინფიცირების პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.