ჯანმო: აშშ-სგან არ მიგვიღია ინფორმაცია, რომელიც ვირუსის ლაბორატორიულ წარმოშობას ადასტურებს - შესაბამისად, ეს მტკიცება სპეკულაციურია

აშშ-ს ჯანდაცვის მსოფლიო ორგანიზაციისათვის არ მიუწოდებია ინფორმაცია იმის შესახებ, რომ კორონავირუსს ლაბორატორიული წარმოშობა აქვს, - განაცხადა ჯანდაცვის მსოფლიო ორგანიზაციის აღმასრულებელმა დირექტორმა, მაიკლ რაიანმა.

„ჩვენ არ მიგვიღია ინფორმაცია, რომელიც ვირუსის ლაბორატორიულ წარმოშობას ადასტურებს. შესაბამისად, ეს მტკიცება სპეკულაციურია. თუ აშშ-ს ეს ინფორმაცია აქვს, თავად უნდა გადაწყვიტონ როდის და როგორ გააზიარონ ის. ამჟამად კი იმ ინფორმაციის საფუძველზე ვმუშაობთ, რომელიც გვაქვს, რომელიც გენეტიკური თანმიმდევრულობის ანალიზს ეფუძნება. ყველაფერი იმას ცხადყოფს, რომ ვირუსს ბუნებრივი წარმოშობა აქვს. ხშირად ჩნდება პოლიტიკური პრობლემები, თუმცა ჩვენი ძალისხმევის ცენტრში მეცნიერება და მეცნიერები უნდა იყვნენ“, - განაცხადა მაიკლ რაიანმა.

აქამდე ტელეარხ ABC-სთვის მიცემულ ინტერვიუში აშშ-ის სახელმწიფო მდივანმა, მაიკ პომპეომ განაცხადა, რომ აშშ-ის ადმ ინისტრაცია მტკიცებულებებს ფლობს იმის თაობაზე, რომ კორონავირუსის გავრცელება უხანში მდებარე ლაბორატორიიდან დაიწყო.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. რა უნდა ვიცოდეთ საგანგებო მდგომარეობის შესახებ, წაიკითხეთ აქ.