მთავრობის ანგარიში - რეკომენდაციების შესრულებაზე დაკვირვებამ აჩვენა, რომ პირველ ეტაპზე საზოგადოების დიდმა ნაწილმა უცვლელ რეჟიმში განაგრძო ცხოვრება

პირველ ეტაპზე საქართველოს მთავრობამ აირჩია უპირატესად რეკომენდაციებისა და საინფორმაციო კამპანიების გზა, თუმცა რეკომენდაციების შესრულებაზე დეტალურმა დაკვირვებამ და შედეგად მიღებულმა ეპიდემიოლოგიურმა ვითარებამ აჩვენა, რომ რეკომენდაციები არასაკმარისი აღმოჩნდა, ვინაიდან საზოგადოების დიდმა ნაწილმა, უმეტესწილად, უცვლელ რეჟიმში განაგრძო ცხოვრება, რაც ზრდიდა ვირუსის გავრცელების, მოქალაქეთა უმრავლესობის დაინფიცირებისა და ქვეყნის ჯანდაცვის სისტემის ჩამოშლის რისკებს, შესაბამისად, დღის წესრიგში დადგა უფრო მკაცრი/სავალდებულო ზომების გატარების და საგანგებო მდგომარეობის გამოცხადების აუცილებლობა, - ამის შესახებ კორონავირუსის წინააღმდეგ საქართველოს მთავრობის მიერ გატარებული ღონისძიებების ანგარიშშია ნათქვამი.

„ქვეყნის ეკონომიკისთვის შეზღუდვების დაწესების პრობლემურობიდან გამომდინარე, საწყის ეტაპზე საქართველოს მთავრობამ აირჩია უპირატესად რეკომენდაციებისა და საინფორმაციო კამპანიების გზა. სავალდებულო მკაცრი შეზღუდვების დაწესება კი ამ ეტაპზე მაქსიმალურად იქნა თავიდან არიდებული. შესაბამისად, ახალი კორონავირუსის დაფიქსირებიდან (26 თებერვლიდან) თითქმის 1 თვის განმავლობაში (21 მარტამდე), მთავრობა აწარმოებდა აქტიურ საინფორმაციო კამპანიებს და გასცემდა რეკომენდაციებს, რომლებიც მოიცავდა „დარჩი სახლში“ საყოველთაო სარეკომენდაციო პოლიტიკას და სოციალური დისტანციის დაცვას; პირადი და საზოგადოებრივი სანიტარულ-ჰიგიენური ნორმების დაცვას; საჯარო და კერძო დაწესებულებების თანამშრომლების დისტანციურ სამუშაო რეჟიმზე გადაყვანას; საზოგადოებრივი თავშეყრის ადგილებში, კაფე-რესტორნებში, გასართობ სივრცეებში, სპორტულ დარბაზებში, აუზებზე, სლოტკლუბებსა და კაზინოებში წასვლისგან თავის შეკავებას, ხოლო მოგვიანებით კი მოწოდებას კაფე-რესტორნების, გასართობი სივრცეების, სპორტული დარბაზების, აუზების, სლოტკლუბებისა და კაზინოების დახურვასთან დაკავშირებით.

თუმცა, აღნიშნული რეკომენდაციების შესრულებაზე დეტალურმა დაკვირვებამ და შედეგად მიღებულმა ეპიდემიოლოგიურმა ვითარებამ აჩვენა, რომ რეკომენდაციები არასაკმარისი აღმოჩნდა, ვინაიდან საზოგადოების დიდმა ნაწილმა, უმეტესწილად, უცვლელ რეჟიმში განაგრძო ცხოვრება, რაც ზრდიდა ვირუსის გავრცელების, მოქალაქეთა უმრავლესობის დაინფიცირებისა და ქვეყნის ჯანდაცვის სისტემის ჩამოშლის რისკებს. შესაბამისად, როდესაც 2020 წლის მარტის მეორე ნახევარში ქვეყანა COVID-19-ის გავრცელების უფრო აქტიურ ფაზაში შევიდა და არსებობდა ვირუსის შიდა უკონტროლო გადაცემის მაღალი რისკები, ამასთან, სახელმწიფო ხელისუფლების ორგანოები მოკლებული იყვნენ უფლებამოსილების ჯეროვნად განხორციელების შესაძლებლობას, დღის წესრიგში დადგა უფრო მკაცრი/სავალდებულო ზომების გატარების და საგანგებო მდგომარეობის გამოცხადების აუცილებლობა.

შეზღუდვების მართვა (შემოღება-გაუქმება) ხორციელდებოდა მსოფლიო ტენდენციებზე დაკვირვებით, საერთაშორისო რეკომენდაციების მიხედვით, ქვეყანაში არსებული ეპიდმდგომარეობის ანალიზისა და შესაძლო რისკების გათვალისწინებით.

• 29 იანვარს შეწყდა პირდაპირი ავიამიმოსვლა საქართველოსა და ჩინეთს სახალხო რესპუბლიკას შორის
• 24 თებერვალს შეწყდა პირდაპირი ავიამიმოსვლა საქართველოსა და ირანის ისლამურ რესპუბლიკას შორის
• 26 თებერვალს შეიზღუდა ირანის ისლამური რესპუბლიკის მოქალაქეებისთვის საქართველოს სახმელეთო საზღვრებზე გადაადგილება
• 6 მარტს შეწყდა პირდაპირი ავიამიმოსვლა საქართველოსა და იტალიის რესპუბლიკას შორის
• 14 მარტს შეჩერდა მოქალაქეთა გადაადგილება საქართველო-სომხეთის რესპუბლიკასა და საქართველო-აზერბაიჯანის რესპუბლიკის საზღვრებზე
• 15 მარტს შეჩერდა მოქალაქეთა გადაადგილება საქართველო-თურქეთის რესპუბლიკის საზღვარზე
• 16 მარტს შეჩერდა მოქალაქეთა გადაადგილება რუსეთის ფედერაციასა და საქართველოს შორის
• 21 მარტს საქართველოში აიკრძალა უცხო ქვეყნის მოქალაქეების შემოსვლა, ეტაპობრივად შეიზღუდა სახმელეთო მიმოსვლა

მსოფლიოში შექმნილი ეპიდსიტუაციის შესაბამისად, მთავრობამ მყისიერი ზომები გაატარა და დროულად აკრძალა ფრენები იმ ქვეყნებიდან, რომლებშიც დაფიქსირდა ვირუსის სწრაფი გავრცელების ტენდენცია. ვირუსთან ბრძოლის კონტექსტში, აღნიშნული შეზღუდვა მსოფლიოში ყველაზე აპრობირებული მეთოდია, რაც ქვეყნებს საშუალებას აძლევს, ერთი მხრივ, შეამცირონ ქვეყანაში ვირუსის შემოტანის საფრთხე, მეორე მხრივ - მოიგონ გარკვეული დრო ჯანდაცვის სისტემის სათანადოდ მომზადებისთვის და მოახდინონ ეპიდემიის კონტროლირებადი მართვა“, - აღნიშნულია ანგარიშში.

კორონავირუსის წინააღმდეგ საქართველოს მთავრობის მიერ გატარებული ღონისძიებების ანგარიშს სრულად შეგიძლიათ გაეცნოთ ბმულზე.