ამირან გამყრელიძე: შეგვიძლია სომხეთს დღეში 500-1 000 ტესტი ჩავუტაროთ, ან 10 000 PCR-ტესტი გავუგზავნოთ

შეგვიძლია სომხეთს დღეში 500-1 000 ტესტი ჩავუტაროთ, ან 10 000 PCR-ტესტი გავუგზავნოთ, - ამის შესახებ დაავადებათა კონტროლის ეროვნული ცენტრის ხელძღვანელმა, ამირან გამყრელიძემ მთავრობის ადმინისტრაციაში გამართულ ბრიფინგზე განაცხადა.

„მე როგორც ვიცი, დღეს სომხეთისა და საქართველოს ჯანდაცვის მინისტრებს შორის შედგება სატელეფონო საუბარი და ყველა დეტალი, თუ რა დახმარება სჭირდება სომხეთს, იქ გაირკვევა. დაავადებათა კონტროლის ცენტრის სახელით ვამბობ, რომ შეგვიძლია ტესტირებაში დახმარება აღმოვუჩინოთ - ყოველდღიურად 500-1 000 PCR-ტესტი შეგვიძლია ჩავუტაროთ სომხეთში აღებულ ნიმუშებს ან ვაჩუქოთ დაახლოებით 10 ათასი PCR-ტესტი“, - განაცხადა გამყრელიძემ.

სომხეთში კორონავირუსის შემთხვევების რიცხვმა 14 ათასს გადააჭარბა, გარდაიცვალა 245 ადამიანი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.