თორნიკე რიჟვაძე: ტურისტული კუთხით სექტემბერი ძალიან დატვირთული თვეა, ამიტომ ინფიცირების შემთხვევების ზრდაც მოსალოდნელი იყო

ყველას, ვინც ბათუმში აპირებს ჩასვლას, მინდა ვუთხრა, რომ ქალაქის ჩაკეტვა არ იგეგმება, ეპიდემიოლოგები სრულად აკონტროლებენ არსებულ რისკებს და ყველამ, ბათუმელებმა თუ ქალაქის სტუმრებმა, უნდა დაიცვან შესაბამისი რეკომენდაციები, - ამის შესახებ აჭარის ავტონომიური რესპუბლიკის მთავრობის მეთაურმა, თორნიკე რიჟვაძემ „ქრონიკასთან“ საუბრისას განაცხადა.

„როგორც იცით, გასული დღეები იყო საკმაოდ მაღალი რისკების შემცველი ინფიცირების თვალსაზრისით. გამოვლინდა ბევრი შემთხვევა, თუმცა ეპიდემიოლოგების დროული ჩარევის შედეგად პრაქტიკულად დადგენილია ყველა კონტაქტი. შესაბამისად, ზოგადი მდგომარეობა რეგიონსა და ქალაქში ექვემდებარება კონტროლს, თუმცა ეს არის საყურადღებო ეპიდემიოლოგიური კერა და მედიკოსები აგრძელებენ მუშაობას ამ კუთხით. ასევე დღეს საკოორდინაციო საბჭოზე იყო მსჯელობა ბათუმში არსებულ ვითარებაზე და მიღებულია გადაწყვეტილება უფასო ტესტირებისა და პერსონალის ტესტირების გაფართოების შესახებ“, - განაცხადა აჭარის მთავრობის მეთაურმა.

მისივე თქმით, შემზღუდავი ღონისძიებების დაწესება ბათუმში არ იგეგმება, თუმცა ტესტირების პროცესი უფრო ინტენსიური გახდება და საზოგადოებრივი კვების ობიექტების პერსონალი დადგენილი წესით გაივლის ტესტირებას.

„დეზინფექციის კუთხითაც გვექნება მაქსიმალური კონტროლი და ეს კონტროლი შეეხება მუნიციპალურ სამსახურებს, ტრანსპორტს, რათა რისკების ეფექტურად მართვა შევძლოთ. მოქალაქეები აქა-იქ უგულებელყოფენ რეკომენდაციებს, თუმცა უნდა გვახსოვდეს, რომ ეს ყველას საერთო პასუხისმგებლობაა. კიდევ ერთხელ მოვუწოდებ რეგულაციების დაცვისკენ. ჩვენ კიდევ უფრო გავამკაცრებთ ამაზე კონტროლს, ვინაიდან სასწორზე დგას მაღალი საზოგადოებრივი სიკეთე - ადამიანების ჯანმრთელობა. თუმცა ვიქნებით უკომპრომისოები და ყველა იმ ობიექტზე, სადაც რეგულაციები გვაქვს დაწესებული, მათი განუხრელი დაცვა უნდა იყოს უზრუნველყოფილი. ღამის კლუბების დახურვას არ ვგეგმავთ, თუმცა მოვუწოდებთ მათ კიდევ ერთხელ, რომ მაქსიმალურად შეასრულონ ყველა მოთხოვნა, იქნება ეს პერსონალის გეგმური ტესტირება, დეზინფექცია თუ სოციალური დისტანციის დაცვა. მხოლოდ ამ შემთხვევაში შეძლებენ ღამის კლუბები საქმიანობის გაგრძელებას. სექტემბერი ტურისტულად ძალიან დატვირთული პერიოდია ბათუმისთვის და მთლიანად რეგიონისთვის, შესაბამისად, მოსალოდნელი იყო ინფიცირების შემთხვევების ზრდაც. ყველას, ვინც ბათუმში აპირებს ჩასვლას, მინდა ვუთხრა, რომ ქალაქის ჩაკეტვა არ იგეგმება, ეპიდემიოლოგები სრულად აკონტროლებენ არსებულ რისკებს და ყველამ, ბათუმელებმა თუ ქალაქის სტუმრებმა, უნდა დაიცვან შესაბამისი რეკომენდაციები“, - განაცხადა რიჟვაძემ.

ამ დროისთვის საქართველოში კორონავირუსის 1 548 შემთხვევაა დადასტურებული. გამოჯანმრთელდა კიდევ 17 პაციენტი – განკურნებულთა რაოდენობა სულ 1 270-ს შეადგენს. უცხოეთიდან სამკურნალოდ გადმოყვანილია საქართველოს 41 მოქალაქე. კორონავირუსის შედეგად, ქვეყანაში 19 პაციენტი გარდაიცვალა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.