თამარ გაბუნია: წელს იქნება პირველი სეზონი, როცა ერთად უნდა გადავიტანოთ კორონავირუსისა და გრიპის ეპიდემია - ამ სეზონისთვის მეტი ყურადღება და მობილიზება გვმართებს

წელს იქნება პირველი სეზონი, როცა ერთად უნდა გადავიტანოთ კორონავირუსისა და გრიპის ეპიდემია. ამდენად, ამ სეზონისთვის, მეტი ყურადღება და მობილიზება გვმართებს, ვიდრე ეს როდესმე ყოფილა, - ამის შესახებ „იმედის“ გადაცემაში „არენა“ ჯანდაცვის მინისტრის მოადგილემ განაცხადა.

თამარ გაბუნიამ სეზონური გრიპის საწინააღმდეგო ვაქცინაზეც ისაუბრა და აღნიშნა, რომ რისკჯგუფთა ნუსხის გადახედვა იგეგმება.

„ვაქცინაციის რისკჯგუფებში, ტრადიციულად, შედიან ის ადამიანები, რომელთაც გართულებების მაღალი რისკი აქვთ. მაგალითად, ქრონიკული დაავადებების, შაქრიანი დიაბეტის მქონე პირები, ასევე, ხანდაზმულები, შარშან პროფესიულ ჯგუფებშიც გვქონდა ვაქცინაცია - საბავშვო ბაღის პედაგოგებში. წელს ეს ნუსხა კიდევ ერთხელ გადაიხედება და საბოლოო სახით ჩამოყალიბდება, ჯანმრთელობის მსოფლიო ორგანიზაციის რეკომენდაციების საფუძველზე, იმისთვის, რომ პირველ რიგში, ყველაზე მაღალი რისკის ჯგუფები მოვიცვათ. მათ შორის, სამედიცინო პერსონალი ყოველთვის არის მაღალი რისკის ჯგუფი. წელს ვაქცინის რაოდენობა უფრო მეტია, ვიდრე შარშან იყო. შარშანდელმა ვაქცინაციამ საკმაოდ კარგი დამცველობითი ფენა შექმნა და გრიპის ბევრი შემთხვევა არ გვქონია. ნიღაბი და ხელის დეზინფექცია ისევე ეფექტურია გრიპისგან თავის დასაცავად, როგორც ნებისმიერი სხვა რესპირაციული დაავადებისგან თავის ასარიდებლად. ესეც დაგვეხმარება. ეს 135 ათასი დოზის გარდა, აქტიურად ვმუშაობთ, რომ დამატებითი დოზები შემოვიდეს, რათა უფრო ფართო რაოდენობა მოვიცვათ. წელს იქნება პირველი სეზონი, როცა ერთად უნდა გადავიტანოთ კორონავირუსისა და გრიპის ეპიდემია. ამდენად, ამ სეზონისთვის მეტი ყურადღება და მობილიზება გვმართებს, ვიდრე ეს როდესმე ყოფილა“ - განაცხადა ჯანდაცვის მინისტრის მოადგილემ.