თამარ გაბუნია: ბათუმში ეპიდემია ლოკალიზებულია და მთელი ძალოსხმევაა მიმართული იქითკენ, რომ სტაბილიზაციას მივაღწიოთ

ეპიდემიის სტაბილიზაციის შესაძლებლობა სრულიად რეალისტურია და ამდენად, ამ შეზღუდვებმა გარკვეულ პერიოდში ჩვენ უნდა დაგვანახოს თავისი შედეგი, - ამის შესახებ ჯანდაცვის მინისტრის მოადგილემ, თამარ გაბუნიამ „იმედის“ გადაცემაში „არენა“ განაცხადა.

თამარ გაბუნიამ ქვეყანაში არსებული სიტუაცია შეაფასა და განაცხადა, რომ ბოლო პერიოდში ინფიცირების შემთხვევების მატებაა, თუმცა კეთილსაიმედო ნიშანია ის, რომ მათი უმეტესი ნაწილი ბათუმში იყო ლოკალიზებული.

„დღეს გარკვეულწილად, თბილისშიც იყო მატბა, ვიდრე სხვაგან, მაგრამ ეპიდემიური ცენტრი რჩება ბათუმში. ლოკალიზებულია ეპიდემია და მთელი ძალოსხმევაა მიმართული იქითკენ, რომ სტაბილიზაციას მივაღწიოთ. ვფიქრობთ, ამის რეალური შესაძლებლობა არსებობს. ის რომ ჯანდაცვის სისტემა მზად იყოს და სათანადო პასუხი მოხერხდეს განსაკუთრებით, მძიმე და კრიტიკულ შემთხვევებზე, დღეს ჩვენთვის ეს მთავარი პრიორიტეტია და ამ მიმართულებით მიდის აქტიური მუშაობა, როგორც თბილისში ასევე, ბათუმში“, - განაცხადა გაბუნიამ.

მას შეზღუდვების მოხსნის მოთხოვნით ბათუმში შიმშილობის აქციის დაწყებაზეც ჰკითხეს, რამდენადაა რეგიონში ამის პირობები.

თამარ გაბუნიამ აღნიშნა, რომ კორონავირუსის წინააღმდეგ პრევენციული ზომები მუშაობს და მოსახლეობას მათი დაცვისკენ მოუწოდა.

მისივე თქმით, ცუდია, რომ კოვიდთან დაკავშირებით სიტუაციის პოლიტიზირება ხდება. გაბუნიამ აღნიშნა, რომ ის პრევენციული ზომები, რომლის განხორციელება ბათუმში 10 დღის წინ დაიწყეს, არსებული სიტუაციიდან გამომდინარე იყო ნაკარნახევი.

„ეპიდემიის სტაბილიზაციის შესაძლებლობა სრულიად რეალისტურია და ამდენად, ამ შეზღუდვებმა გარკვეულ პერიოდში ჩვენ უნდა დაგვანახოს თავისი შედეგი და სწორედ ამ მიზანს ემსახურება. პრევენციული ზომების წინააღმდეგ წასვლა იქნება სრულიად დამაზარალებელი ეპიდემიის მიმდინარეობისთვის. უფრო მეტიც, თუ არ მოხდა, თითოეული ჩვენთაგანის აქტიური ჩართვა ამ ზომებში, განსაკუთრებით, პირადი დაცვის საშუალებების გამოყენების კუთხით, მხოლოდ ჯანდაცვის სიტემისა და სახელმწიფო სტურქტურების მიერ პრევენციული ზომების განხორციელება ძლიან რთული იქნება. ეს არის ის, რაც მუშობს. თუ ამას არ გამოვიყენებთ, რელურად ვკარგავთ შესაძლებლობას, დავიცვათ თავი და ჩვენი ახლობლები ინფექციის გავრცელებისგან. ამდენად, პრვენცია, ამ პრობლემის მთავარი გადაწყვეტაა და ნებისმიერი მოქმედება, რაც ხელს შეუშლის პრევენციული ღონისძიებების განხორციელებას, რა თქმა უნდა, დამაზარალებელია“, - განაცხადა თამარ გაბუნიამ.

დღეს კოვიდინფიცირების ახალი შემთხვევებიდან 348 აჭარაში, 99 თბილისში, 59 კი იმერეთში დაფიქსირდა.

ამ დროისთვის ქვეყანაში კორონავირუსის 9245 შემთხვევაა დადასტურებული, გამოჯანმრთელებულია 4887 ადამიანი. უცხოეთიდან სამკურნალოდ გადმოყვანილია საქართველოს 41 მოქალაქე. გარდაიცვალა 58 პაციენტი.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.