მაია ცქიტიშვილი: სისტემური შეზღუდვები არ იგეგმება

ყველამ ძალიან კარგად ვიცით, რომ ვირუსის გავრცელების შესაკავებლად აუცილებელია მობილობის დაგდება. ჩვენ ეს ვისწავლეთ, ვიცით და ვხედავთ, მთელი მსოფლიოს მასშტაბით ასევე გამოიყენება სხვადასხვა ტიპის ღონისძიებები, რომელიც უშუალოდ არის მიმართული იმისკენ, რომ მოხდეს მობილობის შემცირება და შესაბამისად, ვირუსის გავრცელების შენელება, - ამის შესახებ ვიცე-პრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა, უწყებათაშორისი საკოორდინაციო საბჭოს სხდომის დასრულების შემდეგ, მთავრობის ადმინისტრაციაში გამართულ ბრიფინგზე განაცხადა.

როგორც მაია ცქიტიშვილმა აღნიშნა, საბჭო მსჯელობს, თუ რა დამატებითი ღონისძიებების და წერტილოვანი შეზღუდვების დაწესება არის შესაძლებელი იმისთვის, რომ ვირუსის გავრცელების შენელება მოხდეს.

„ეს შეიძლება იყოს სხვადასხვა ტიპის ღონისძიებები, როგორიც არის მაგალითად საღამოს საათებში, ღამის საათებში გადაადგილების შეზღუდვა, ეს შეიძლება იყოს უქმე დღეებში, ან კვირის რომელიმე ერთ კონკრეტულ დღეს ან სხვადასხვა დასახლებაში, ასევე, როგორც ტრანსპორტის შეჩერება, ასევე სხვადასხვა დიდი სავაჭრო ცენტრის, ან სხვადასხვა სახის დიდი გადაადგილების - ბაზრობების, ან ბაზრების მუშაობის შეჩერება. ეს არის ყველა ისეთი ღონისძიება, რომელიც არის წერტილოვანი ხასიათის, რომელიც იქნება გამოყენებული იქ და იმ დროს, როდესაც ამის აუცილებლობა იქნება ეპიდემიოლოგიური ვითარებიდან გამომდინარე და ყველა ამ ღონისძიების გამოყენება არის ის პრაქტიკა და იმ ცოდნაზე დაფუძნებული, რომელსაც ჩვენ ვხედავთ ჩვენს მეზობელ ქვეყნებში, ევროპის ქვეყნებსა და მსოფლიოს სხვადასხვა ქვეყანაში. წერტილოვანი შეზღუდვების ფარგლებში, ძალიან მიზნობრივად, ეფექტური მიზეზშედეგობრივი შეზღუდვების დაწესებით, ჩვენ, რა თქმა უნდა, იძულებული ვიქნებით, რომ შევზღუდოთ მობილობა იქ, სადაც ამის საჭიროება დადგება. სისტემური შეზღუდვები არ იგეგმება“, - განაცხადა ცქიტიშვილმა.