კონსტანტინე ქავთარაძე: საერთო შეფასებით, კანადაში კოვიდპანდემიასთან დაკავშირებული სიტუაცია საშუალო სიმძიმისაა

კანადაში საქართველოს ელჩი, კონსტანტინე ქავთარაძის, განცხადებით, კვლავ ძალაშია შეზღუდვები ვირუსის გავრცელების შესამცირებლად.

„კანადის პრემიერმა განაცხადა, რომ ეს შეზღუდვები ვერ მოიხსნება კანადაში, ვიდრე მასობრივი ვაქცინაცია არ იქნება. 9 დეკემებერს მიიღო ჯანდაცვის სამინისტრომ გადაწყვეტილება და დაამტკიცა ფაიზერი/ბიონტეკის ვაქცინა. ამას წინ უძღოდა მონაცემების საგულდაგულო შესწავლის პროცესი, რომელიც 2 თვეზე მეტ ხანს გაგრძელდა. ბევრმა გააკრიტიკა კანადის ჯანდაცვის სამინისტრო, რომ მათ ძალიან დიდი დრო მოანდომეს ვაქცინის მონაცემების დამუშავებას. შედეგი უკვე არის და ვაქცინაცია დაიწყო“, - აღნიშნა ელჩმა.

მისივე განცხადებით, დეკემბრის ბოლომდე, კანადას ექნება ვაქცინის მხოლოდ 250 000 დოზა.

„საუბარია ჯერ ფაიზერი/ბიონტეკის ვაქცინაზე. მომავალი წლის მარტამდე კანადაში 4 მილიონი დოზას ელოდებიან. მარტო ფაიზერიდან კანადა 2021 წელს ვაქცინის 76 მილიონ დოზას ელოდება. დიდი რაოდენობა განპირობებული სრულყოფილი ვაქცინაციისთვის საჭირო 2 დოზით.ვაქცინის პირველი პარტია მოხმარდება მოსახლეობის ყველაზე მოწყვლად ნაწილს.მომავალ წელს ვაქცინა უკვე გადანაწილდება და ყველასთვის იქნება ხელმისაწვდომი. კოვიდ19 - ის წინააღმდეგ ვაქცინით აცრა ყველა კანადელისთვის უფასოა და ამავე დროს არა არის სავალდებულო. რაც შეეხება მოწინააღმდეგეებს, ერთი ნაწილი მართლაც სკეპტიკურად უყურებს ვაქცინაციას. მათი აზრით, ვაქცინის დაშვება მასობრივი გამოყენებისთვის კანადაში შედარებით სწრაფად გამოვიდა და შიშობენ რამდენად იქნებიან დაზღვეული გვერდითი ეფექტებისგან. კანადის სამედიცონო სფეროს ექსპერტებმა განაცხადეს, რომ კლინიკური კვლევების პერიოდში ფაიზერმა ვაქცინა ათასობით ადამიანზე გამოსცადა და დაამტკიცა მისი ეფექტიანობა და სანდოობა“ - აღნიშნა კონსტანტინე ქავთარაძემ.

მისივე განმარტებით, ვაქცინის გადანაწილება დაიწყო კანადის პროვინციებზე, მოსახლეობის რაოდენობის მიხედვით.

„უნდა აღინიშნოს, რომ კანადაში ყველა პროვინციას საკუთარი ანტიპანდემიური რეგულაციები აქვს დაწესებული. პროვინციები თავად განსაზღვრავენ ვაქცინაციის წესებს, მაგრამ ყველა თანხმდება იმაზე, რომ ჯერ პრიორიტეტი ხანდაზმულთა სახლებში მყოფ ადამიანებს უნდა მიენიჭოთ, 80 წელს ზევით ასაკობრივ ჯგუფს, ინფიცირებული პაციენტების მკურნალ სამედიცინო პერსონალს და კანადის აბორიგენ მოსახლეობას. კანადის მოსახლეობის უმეტესობას იმედი აქვს, რომ ვაქცინაციის პროცესი მათ საშუალებას მისცემს გახსნას საზღვრები უცხოელებისთვის და მეტნაკლებად აღადგინოს ჩვეული ეკონომიკური აქტივობა ქვეყნის შიგნით. ეს განსაკუთრებით ეხება ტურიზმს და საავიაციო სფეროს, რომლებიც ყველაზე მეტად დაზარალდნენ კორონავირუსის პანდემიის დროს. ჩვენთან შემოსული ფორმალური თუ არაფორმალური ინფორმაციის საფუძველზე შემიძლია ვთქვა, რომ იყო კოვიდ19 -ით დაინფიცირების შემთხვევები ქართველ ემიგრანტებს შორის, რომლებიც უკვე კანადის მოქალაქეები არიან. მათ მიმართეს კანადის სამედიცინო და ჯანდაცვის სისტემას და გაეწიათ შესაბამისი მკურნალობა. ჩვენი ინფორმაციით, მძიმე გართულებებს ადგილი არ ჰქონია. ვისაც ვირუსი ჰქონდა თავს უკვე კარგად გრძნობენ“ - აცხადებს დიპლომატი.

კანადაში ბოლო 24 საათში Covid 19 -ით ინფიცირების 2275 ახალი შემთხვევა დაფიქსირდა. გარდაიცვალა 20 ადამიანი. 37 მილიონიან კანადაში აღრიცხულია კორონავირუსიით ინფიცირების 471 137 შემთხვევა და გარდაცვლილია 13 573 ადამიანი.