ამირან გამყრელიძე: საქართველოში პირბადის ტარების მაჩვენებელი შემცირებულია, კვლავ ვქმნით ილუზიას, რომ კორონავირუსი დავამარცხეთ

ბოლო მონაცემებით, ბოლო კვირაში პირბადის ტარების მაჩვენებელში გვაქვს კლება 62 პროცენტამდე, რაც იმის ნიშანია, რომ რადგან ქვეყანაში ეპიდსიტუაცია სტაბილურდება, კვლავ ვქმნით ილუზიას, რომ ჩვენ კორონავირუსი დავამარცხეთ, არადა, 400 ყოველდღიური შემთხვევა არ არის ცოტა საქართველოსთვის, ძალიან საყურადღებოა, - ამის შესახებ დაავადებათა კონტროლის ეროვნული ცენტრის დირექტორმა, ამირან გამყრელიძემ უწყებათაშორისი საკოორდინაციო საბჭოს სხდომის შემდეგ გამართულ ბრიფინგზე განაცხადა.

გამყრელიძე მოქალაქეებს თხოვნით მიმართავს, პირბადის ტარების მაჩვენებელი არათუ შეამცირონ, არამედ 95 პროცენტამდე გაზარდონ, რადგან ამ დრომდე ნიღაბი მთავარი პრევენციული საშუალებაა.

„მოგეხსენებათ, ჩვენ ძალიან კარგად ვთანამშრომლობთ ჯანმრთელობის გაზომვათა ინსტიტუტთან, რომელიც გარკვეულად პროგნოზირებას გვიკეთებს, ასევე გუგლის საშუალებით ითვლის ჩვენთან პირბადის ტარების მაჩვენებელს, რომელიც შემოდგომასთან მიმართებაში გაზრდილი იყო 72 პროცენტამდე, ბოლო მონაცემებით, ბოლო კვირაში გვაქვს კლება 62 პროცენტზე. ეს ნიშანია იმისა, რომ რადგან ქვეყანაში ეპიდსიტუაცია სტაბილურდება, კვლავ ვქმნით ილუზიას, რომ ჩვენ კორონავირუსი დავამარცხეთ, არადა, 400 ყოველდღიური შემთხვევა არ არის ცოტა საქართველოსთვის, ძალიან საყურადღებოა. კიდევ ერთი თხოვნა მაქვს მოსახლეობისადმი, მთავარი პრევენციული საშუალების, პირბადის ტარება კიარ უნდა შევამციროთ 62 პროცენტამდე და ქვემოთ, არამედ პირიქით, ავწიოთ 95 პროცენტამდე დ ყველა შემსუბუქება, რაც დღეს გამოცხადდა, უფრო ადვილად გადაგვატანინებს მომავალ ორ თვეს“, - განაცხადა ამირან გამყრელიძემ.