EMA ევროკავშირის ქვეყნებს მოუწოდებს, თავი შეიკავონ Sputnik V-ის დამტკიცებისგან მანამ, სანამ სააგენტო ვაქცინის უსაფრთხოებასა და ეფექტურობას განიხილავს

ევროპის წამლის სააგენტო ევროკავშირის წევრ ქვეყნებს მოუწოდებს, თავი შეიკავონ რუსული ვაქცინის Sputnik V-ის ეროვნულ დონეზე დამტკიცებისგან მანამ, სანამ სააგენტო ვაქცინის უსაფრთხოებასა და ეფექტურობას განიხილავს.

„ჩვენ გვჭირდება დოკუმენტები, რომელთა განხილვასაც შევძლებთ. ამჟამად არ გვაქვს მონაცემები ვაქცინირებული ადამიანების შესახებ. ამიტომ ვურჩევ, თავი შეიკავონ ეროვნულ დონეზე საგანგებო ავტორიზაციის მინიჭებისგან. Sputnik V-ი მომავალში ბაზარზე შეიძლება გვქონდეს, მაგრამ როდესაც შესაბამისი მონაცემების განხილვა მოხდება“, - განაცხადა ევროპის წამლის სააგენტოს მმართველი საბჭოს ხელმძღვანელმა, კრისტა ვირტჰუმერ-ჰოხემ.

Sputnik V-ი უკვე დამტკიცებულია ან დამტკიცების მიზნით მისი შეფასება მიმდინარეობს ევროკავშირის სამ წევრ სახელმწიფოში: უნგრეთში, სლოვაკეთსა და ჩეხეთის რესპუბლიკაში.

4 მარტს, ევროპის წამლის სააგენტომ (EMA) რუსული ვაქცინა „სპუტნიკ V“-ის ექსპერტიზის პროცედურა დაიწყო. ევროკავშირის მარეგულირებელში განაცხადეს, რომ ექსპერტიზის ფარგლებში, სპეციალისტები პრეპარატის ევროკავშირის სტანდარტებთან შესაბამისობას შეაფასებენ.