სილვიო დომენტე: საქართველომ ვაქცინაციის ძალიან კარგი და მრავალმხრივი გეგმა შეიმუშავა​

ჯანდაცვის მსოფლიო ორგანიზაციის საქართველოს წარმომადგენლობის ხელმძღვანელის, სილვიო დომენტეს განცხადებით, საქართველო იყო პირველი ქვეყანა, რომელიც კოვაქსს შეუერთდა და ერთ-ერთ პირველი, რომელმაც გაიარა ყველა საჭირო პროცედურა.

„საქართველომ ვაქცინაციის ძალიან კარგი და მრავალმხრივი გეგმა შეიმუშავა, რომელიც დამტკიცდა და ახლა მიმდინარეობს მისი განხორციელება. ჩვენ, როგორც ჯანმრთელობის ორგანიზაციას და პარტნიორებს, ძალიან გვიხარია, რომ შევძელით ვყოფილიყავით ამ პროცესის ნაწილი. ჩვენ მზად ვართ, შემდგომი თანამშრომლობისთვის და ჩვენ წვლილს შევიტანთ, რომ ვაქცინაციის კამპანია ქვეყანაში კარგად განხორციელდეს. ჩვენმა დირექტორმა ტედროსმა დასვა ასეთი სამიზნე, რომ წლის პირველი 100 დღის განმავლობაში, დაავადებასთან ბრძოლის წინა ხაზზე მყოფი ყველა ადამიანი უნდა იყოს ვაქცინირებული. ჩვენ ახლა 72-ე დღე გვაქვს ამ გეგმის. კარგი შანსია, რომ საქართველომ ამ სამიზნე ნიშნულს მიაღწიოს. მინდა, წარმატება ვუსურვო ყველა ადამიანს, რომელიც ჩართულია ვაქცინაციის პროცესში“, – განაცხადა სილვიო დომენტემ.

AstraZeneca/Oxford-ის ვაქცინის 43 200 დოზა დაავადებათა კონტროლის ცენტრში მიიღეს და სპეციალურ მაცივრებში დააბინავეს.