თამარ გაბუნია: ვფიქრობ, რისკების მაქსიმალური დაცვით, უსაფრთხოების კიდევ მეტად გაძლიერებით დავძლევთ ამ პირველ წარუმატებელ და უიღბლო, ტრაგიკულ ნაბიჯს, რომლითაც სამწუხაროდ ჩვენი პროგრამა დაიწყო

ნამდვილად ძალიან ტრაგიკული შემთხვევა მოხდა და ჩვენთვის ძალიან დიდი დარტყმაა ეს ყველაფერი, მაგრამ რისკი, რომლის წინაშეც ჩვენ ვდგავართ, არის ასევე სასიცოხლო რისკი - ეს არის ეპიდემიასთან დაკავშირებული რისკი, - ამის შესახებ ჯანდაცვის მინისტრის მოადგილემ, თამარ გაბუნიამ „იმედის დღეში“ 27 წლის ექთნის გარდაცვალების შესახებ საუბრისას განაცხადა.

მისი თქმით, ვაქცინასთან დაკავშირებულ სარგებელზე ყველა თანხმდება. „ყველა დაკარგული სიცოცხლე უდიდესი ტრაგედიაა ოჯახისთვის, საზოგადოებისა და თითოეული ჩვენგანისთვის, მაგრამ ამ შემთხვევაში, როდესაც ეპიდემიებზე ვსაუბრობთ, საუბარია მოსალოდენელ სარგებელსა და იმაზე, თუ რამდენ სიცოცხლეს გადავარჩენთ იმით, თუ ყველა ჩვენგანი გავიკეთებთ ვაქცინას და შევქმნით გარკვეულ დაცვას ჩვენი თავისა და საზოგადოებისთვის. ამდენად, ისევ და ისევ რისკების მაქსიმალური დაცვით, უსაფრთხოების კიდევ მეტად გაძლიერებით ვფიქრობ, ჩვენ დავძლევთ ამ პირველ წარუმატებელ და უიღბლო, ტრაგიკულ ნაბიჯს, რომლითაც, სამწუხაროდ, ჩვენი პროგრამა დაიწყო და გვექნება ძალა და გონიერება იმისთვის, რომ გავაგრძელოთ და მივიყვანოთ ჩვენი მიზნები იქამდე, რომ შეიქმნას ერთიანი დაცვის ფენა ქვეყანაში და ამით გადავარჩინოთ ბევრი სიცოცხლე ასევე უდიდესი სასიცოცხლო რისკებისგან, რასაც კოვიდი იწვევს“, - განაცხადა ჯანდაცვის მინისტრის მოადგილემ.

27 წლის ექთანი, რომელსაც ახალციხეში კორონავირუსზე აცრის შემდეგ მძიმე გვერდითი რეაქცია გამოუვლინდა, გარდაიცვალა. ექთანს მძიმე გვერდითი რეაქცია განუვითარდა.ის გუშინვე, თბილისში, პირველ საუნივერსიტეტო კლინიკაში გადმოიყვანეს. ახალციხის კლინიკაში მომხდარ შემთხვევასთან დაკავშირებით ჯანდაცვის სამინისტროში გუშინ შეხვედრა გაიმართა, სადაც ჯანდაცვის ექსპერტები, დარგის სპეციალისტები და გვერდითი მოვლენების მართვის კომიტეტის წარმომადგენლები ვაქცინაციის დროებით შეჩერებასთან დაკავშირებით მსჯელობდნენ. მოგვიანებით ჯანდაცვის მინისტრმა, ეკატერინე ტიკარაძემ განცხადა, რომ საქართველოში „ასტრაზენეკათი“ ვაქცინაცია გაგრძელდება.

საქართველოში კორონავირუსის საწინააღმდეგო ვაქცინაცია 2021 წლის 15 მარტიდან დაიწყო.