ამირან გამყრელიძე: ხშირად სამედიცინო მუშაკების ხვედრია, რომ შესაძლოა დაიღუპო, მაგრამ სხვას მისცე გადარჩენის საშუალება

ხშირად, ეს არის ჩვენი, სამედიცინო მუშაკების ხვედრი, შენ შესაძლოა, დაიღუპო, მაგრამ სხვას მისცე გადარჩენის საშუალება, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.

მისი თქმით, გუშინდელი შემთხვევა ძალიან მძიმე დაღია თითოეული იმ ადამიანისთვის, რომელიც დღეს ზოგადად, მედიცინაში არის, განსაკუთრებით კი კოვიდთან ბრძოლის პროცესში მყოფი ადამიანებისთვის.

„რა თქმა უნდა, ეს შემთხვევა ემოციურად ძალიან მძიმეა, მაგრამ როდესაც ამ ყველაფერს ცივი გონებით აწონით, იმ სარგებელთან, იმუნიზაციასთან, რომელმაც უნდა დაასრულოს კოვიდთან ბრძოლის პროცესი, ჯერჯერობით სხვა არაფერი გახლავთ და ვერც იქნება, თუ საზოგადოებაში პოპულაციური იმუნიტეტი არ ჩამოყალიბდა, რასაც მხოლოდ მასობრივი იმუნიზაცია ქმნის. დღეს კოვიდთან ბრძოლას ვერ დავასრულებთ, ვიდრე 60-70-პროცენტიანი ფენა არ ჩამოყალიბდება.

გუშინ ძალიან რთული იყო საბჭოზე მსჯელობა და გადაწყვეტილების მიღება, შეჩერებულიყო თუ გაგრძელებულიყო იმუნიზაცია. შეჩერება ყოველთვის ადვილია, მაგრამ შემდეგ რას ვეუბნებით ადამიანებს, როდესაც ყოველდღიური სიკვდილიანობა გვაქვს კოვიდის გამო. ხშირად ეს არის ჩვენი, სამედიცინო მუშაკების ხვედრი, შენ შეიძლება დაიღუპო, მაგრამ სხვას მისცე გადარჩენის საშუალება. ეს ძალიან მძიმე ფაქტია, განსაკუთრებით ოჯახისთვის, ასევე იმ მხარისთვის, სადაც გოგონა მოღვაწეობდა, მაგრამ სხვა ალტერნატივა, რომ ქვეყანაში იმუნიზაცია არ გაგრძელდეს, არ არის. უნდა გაგრძელდეს და თქვენ უნდა გთხოვოთ, რომ ამ კამპანიაში კიდევ მეტად, ფართოდ ჩაერთოთ. რაც მეტი აიცრება ქვეყანაში, მეტად დაზღვეული იქნება საზოგადოება, რომ ახალი ფატალური შედეგები არ გვქონდეს“, – განაცხადა ამირან გამყრელიძემ.

27 წლის ექთანი, რომელსაც ახალციხეში კორონავირუსზე აცრის შემდეგ მძიმე გვერდითი რეაქცია გამოუვლინდა, გარდაიცვალა. ის გუშინვე, თბილისში, პირველ საუნივერსიტეტო კლინიკაში გადმოიყვანეს. ახალციხის კლინიკაში მომხდარ შემთხვევასთან დაკავშირებით ჯანდაცვის სამინისტროში გუშინ შეხვედრა გაიმართა, სადაც ჯანდაცვის ექსპერტები, დარგის სპეციალისტები და გვერდითი მოვლენების მართვის კომიტეტის წარმომადგენლები ვაქცინაციის დროებით შეჩერებასთან დაკავშირებით მსჯელობდნენ. მოგვიანებით ჯანდაცვის მინისტრმა, ეკატერინე ტიკარაძემ განაცხადა, რომ საქართველოში „ასტრაზენეკათი“ ვაქცინაცია გაგრძელდება.

საქართველოში კორონავირუსის საწინააღმდეგო ვაქცინაცია 2021 წლის 15 მარტიდან დაიწყო.