ბელგიამ აპრილიდან დაგეგმილი შეზღუდვების მოხსნა გაურკვეველი ვადით გადადო

ბელგიამ პირველი აპრილიდან დაგეგმილი შეზღუდვების მოხსნა გაურკვეველი ვადით გადადო. მიზეზი კორონავირუსის ყოველდღიური შემთხვევების მკვეთრი მატება და ინფიცირებულთა ჰოსპიტალიზაციის ზრდაა.

საკოორდინაციო საბჭომ ეპიდემიოლოგიური ვითარება დაგეგმილზე ერთი კვირით ადრე შეაფასა და ამის შესახებ განცხადება ბელგიის სამეფოს პრემიერ-მინისტრმა გააკეთა. „პანდემია არ დასრულებულა და ჯერ ვერ ვიტყვით როდის დასრულდება. ძალიან გვინდა შეზღუდვები მოვხსნათ, მაგრამ ამის შესაძლებლობა და პირობები ბელგიაში არაა. ექსპერტები ვარაუდობდნენ მესამე ტალღას და ყოველდღიური შემთხვევების ზრდას, მაგრამ ეს იმაზე სწრაფად ხდება, ვიდრე გვეგონა. ვირუსი ძალიან სწრაფად ვრცელდება და ამას ემატება ჩვენი ქცევის ცვლილებაც.

სიტუაციის ანალიზმა აჩვენა, რომ გაზრდილია მობილობა. ეს ყველაზე მეტად აისახება ეპიდემიოლოგიურ ვითარებაზე. ექსპერტთა ჯგუფის მიერ ჩატარებული მონიტორინგის მონაცემების თანახმად, ინფექციის გავრცელების წყარო სკოლებიც გახდა. ბავშვები ინფიცირდებიან და ვირუსის ოჯახის წევრებისთვის ვირუსის გავრცელების წყაროს წარმოადგენენ, რაც ვითარებას უკიდურესად ართულებს. პანდემიამ გვასწავლა, რომ ვირუსს ამცირებს კონტაქტების შემცირება. ძალიან გთხოვთ მაქსიმალურად შეამციროთ კონტაქტები, წინააღმდეგ შემთხვევაში კორონავირუსს ვერ დავამარცხებთ“, - განაცხადა პრემიერ-მინისტრმა ალექსანდრე დე კრომ.

საკოორდინაციო საბჭოს გადაწყვეტილებით ძალაში რჩება დისტანციურად მუშაობა . COVID19-ზე ტესტირებას გავლა მოუწევთ მათ, ვისი სამუშაო ადგილზე გამოცხადებაც გადაუდებელ აუცილებლობას წარმოადგენს. ორშაბათიდან სწრაფი ტესტები ჩაუტარდებათ მეხანძრეებს, პოლიციასა და ფოსტის თანამშრომლებს.

„სიტუაცია მარტივი არაა. ძალიან გვინდა სააღდგომო არდადეგების შემდეგ სკოლების გახსნა შევძლოთ, თუმცა ძალიან დიდი რისკის წინაშე ვართ. დაფიქრება და სტრატეგიის მიხედვით მოქმედებაა აუცილებელი.ორშაბათს განათლების სამინისტროში საგანგებო შეხვედრა გაიმართება და მოქმედების გეგმას შევიმუშავებთ. რისკების გადაზღვევა ვირუსის გავრცელების შემცირებას შეუწყობს ხელს. სავარაუდოდ, ჯერჯერობით ვერც ჰოსპიტალურ სექტორს გავხსნით და ვერც 2 მაისს კაფეებსა თუ რესტორნებს. წესებს და შეზღუდვებს უნდა დავემორჩილოთ. ძალიან რთულია, ყველა გადაიღალა, მაგრამ სხვა გამოსავალი არ გვაქვს“, -განაცხადა ჯანდაცვის მინისტრმა ფრანკ ვანდერბრუკმა.

კრიზისის ცენტრის გადაწყვეტილებით, ძალაში დარჩა კომენდანტის საათი, არააუცილებელი მგზავრობის შეჩერება. ბელგია ისევ დაკეტილია ტურისტებისთვის და ქვეყანას მესამე ქვეყნებთან საზღვარი განსაკუთრებული შემთხვევების გარდა დაკეტილი აქვს.