ბელგიაში კოვიდვაქცინით უკვე 4 მილიონი ადამიანი აიცრა

ბელგიაში პანდემიის დროს პირველად დადებითობის მაჩვენებელი 0,88 -ს შეადგენს. მთავრობის გეგმის თანახმად, 15 აგვისტომდე მოსახლეობის 75 % ვირუსის მძიმე გართულებებისგან დაცული იქნება და ე.წ ჯოგური იმუნიტეტი რეალობად იქცევა.

ექსპერტებთან ერთად ხელისუფლებამ დაიწყო მუშაობა ვაქცინაციის შემდგომ ეტაპზე, რაც ვაქცინის მესამე დოზის გაკეთებას გულისხმობს.

ბელგიის ვაქცინაციის ჯგუფის ხელმძღვანელის დირკ რამაეკერსის თქმით, ვაქცინის მესამე დოზის ადმინისტრირება სავარაუდოდ 2021 წლის დეკემბრიდან დაიწყება. პროტოკოლით იქნება განსაზღვრული, თუ ვისთვის იქნება იმუნიტეტის გასაძლიერებლად საჭირო COVID19-ის საწინააღმდეგო ვაქცინის მესამე დოზის გაკეთება.

ვაქცინაციის ცენტრში ამბობენ, რომ მესამე დოზა რისკ-ჯგუფების დასაცავად დამატებითი პრევენციული ზომა იქნება, მაგრამ შესაძლოა მესამედ აცრა ყველა ასაკობრივ ჯგუფს შესთავაზონ.

ბელგიაში კორონავირუსის ყოველდღიური დადასტურებული შემთხვევები ბოლო 2 კვირაში 25 %-ით შემცირდა. ბოლო 24 საათში გამოვლინდა 1 852 ახალი შემთხვევა და გარდაიცვალა 23 ადამიანი.

საკოორდინაციო საბჭოს წარმომადგენლებმა განაცხადეს, რომ მათი მიზანია 11 ივლისიდან ვაქცინაციაში ჩართვა 16-17 წლის ასაკის მოქალაქეებსაც შესთავაზონ. ბელგიაში მუშაობენ ე.წ. მწვანე ბარათის შემოღებაზე, რაც ვაქცინირებულ ადამიანებს შესაძლებლობას მისცემს აგვისტოდან კულტურულ ღონისძიებებს ტესტის გავლის გარეშე დაესწრონ.

საკოორდინაციო საბჭო აქტიურად მუშაობს სტრატეგიაზე, რომლის თანახმადაც 2021 წლის ზაფხულში მოსახლეობა უსაფრთხოდ დასვენებას შეძლებს. ამ სტრატეგიის მნიშვნელოვანი ნაწილი ტესტირების შესაძლებლობის გაორმაგებაა. დღესდღეობით ბელგიაში ყოველდღიურად COVID19-ის პრევენციისთვის 50 000-მდე ტესტი კეთდება.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.