კლინიკა „მედიქალ სიტი“: ყოველთვის ბრალდებულის როლში ყოფნა კლინიკების სამწუხარო რეალობაა - საქართველოში არსებული კლინიკები ნამდვილად მზად არიან პანდემიის დასამარცხებლად

კლინიკა „მედიქალ სიტი“, ვაქცინაციასთან დაკავშირებით, განცხადებას ავრცელებს. კლინიკის ადმინისტრაცია ახალციხეში, ვაქცინაციის დროს გარდაცვლილი ექთნის, მეგი ბაქრაძის ოჯახს უსამძიმრებს და იმედს გამოთქვამს, რომ მომხდარზე სიმართლე დადგინდება.

„არავითარ შემთხვევაში არ შევალთ საკითხის განხილვაში რა მოხდა, ვინ დაუშვა და რა შეცდომა, მაგრამ აუცილებლად ვთვლით, რომ გავაკეთოთ განმარტება იმის თაობაზე, თუ როგორ შეხვდნენ კლინიკები ვაქცინაციის დაწყების პროცედურას. ვიტყვით ჩვენი კლინიკის მაგალითზე, რომ ორჯერ იყვნენ ჩამოსული სამინისტროს რეგულირების სააგენტოდან სპეციალისტები, რათა კლინიკაში, აცრებისთვის, ორგანიზებულიყო და სანებართვო პირობები დაკმაყოფილებულიყო. პირველ ეტაპზე, ჩატარდა მონიტორინგი, მოგვეცა დირექტივები და ვადები ორგანიზაციული საკითხების მოსაწესრიგებლად, შემდეგ, ჩატარდა გაცემული დირექტივების შესრულების ინსპექტირება და ამ ორეტაპიანი პროცედურის გავლის შემდეგ, მოგვენიჭა უფლებამოსილება, რომ ჩავრთულიყავით აცრების სახელმწიფო კომპონენტში. ამ პროცედურების გავლის შემდეგ, როგორც ადგილზე, ისე საზოგადოებრივი ჯანდაცვის რეგიონალურ სამსახურში, სამი დღის განმავლობაში, ტარდებოდა ტრეინინგ-სემინარები აბსოლუტურად ყველა განსახორციელებელ პროცედურებზე, როგორც წინასწარი, ისე - აცრის შემდგომი პერიოდების პრევენციისათვის.

არ იყო არცერთი საკითხი, რომელზეც არ გაცემულა პასუხი და შესაბამისად, ყველა კლინიკას ჰქონდა, აქვს და ექნება მომავალში ქმედების პროტოკოლი, სადაც, მათ შორის, გათვალისწინებულია ყველაზე უარეს და უმძიმეს შემთხვევაში განსახორციელებელ ქმედებათა ნუსხა, მათ შორის - პაციენტის ინფორმირება მოსალოდნელ გართულებებზე.

ეს განცხადება არ გაგვიკეთებია, რომელიმე საჯარო სტრუქტურის ადვოკატირებისათვის, ეს მხოლოდ გავაკეთეთ იმისათვის, რომ საზოგადოებრივი აზრი, ამ კუთხით, იყოს ჯანსაღი და არა ჩასაფრებულ პოზიციებზე დაფუძნებული. მსოფლიოში პანდემიის შედეგად გამოწვეულმა ამ უმძიმესმა მდგომარეობამ არამც და არამც არ უნდა შექმნას საზოგადოებაში მცდარი შეხედულება, უბრალოდ არ არის ამის ღირსი საზოგადოება და მათ უნდა ჰქონდეთ გარანტია, რომ საქართველოში პროცესები ორგანიზებულად მიმდინარეობს. მედიცინა არ იცნობს პოლიტიკას და პაციენტებს არ ყოფს შეხედულებების მიხედვით. გვინდა, დავადასტუროთ დიდი პატივისცემა საქართველოს ყველა მოქალაქისადმი, განურჩევლად მათი შეხედულებებისა და მოვუწოდოთ მათ, რომ სამედიცინო დაწესებულებები, საჭიროებისამებრ, მათ სამსახურში არიან. მედიცინა არის ჭეშმარიტი მეცნიერება, მაგრამ - არა ზუსტი. სამწუხაროდ, ვერ ხერხდება ყველას გადარჩენა. პაციენტის მომსახურების ხარისხზე ორიენტირებულ კლინიკებს აქვთ საქმიანობის სტაბილურად გაგრძელების პერსპექტივა და გვინდა, რომ ყველას სჯეროდეს, სამედიცინო დაწესებულებებიც ამ ქვეყნის ნაწილია - თავიანთი დადებითი და უარყოფითი მხარეებით.

გვინდა, ვუსურვოთ ქვეყანას, რომ არ ჰყავდეს ბევრი დაავადებული პაციენტი და არ იყოს დაწესებულებებში მიმართვიანობის მზარდი სტატისტიკა, მაგრამ თუ სამედიცინო დაწესებულება დასჭირდება პაციენტს, ღმერთის წყალობით, საქართველოში არიან წარმატებული კლინიკები თავიანთი პროფესიონალური გუნდით და მათაც სჭირდებათ მხარდაჭერა - საზოგადოებრივი აზრის თვალსაზრისით. ცივილიზაციაში იდეალური არაფერია და მათ შორის, არ არსებობს იდეალური მედიცინა, მაგრამ უკვე შეურაცხმყოფლად იქცა ფრაზები; სამედიცინო კლინიკები არ აღმოჩნდნენ მზად ამა თუ იმ პროცედურების განსახორციელებლად. ყოველთვის ბრალდებულის როლში ყოფნა კლინიკების სამწუხარო რეალობაა, რომელსაც ნამდვილად არ იმსახურებს არც კლინიკები და არც სამედიცინო პერსონალი. კონკრეტული გარდაცვალების ფაქტზე, ვფიქრობთ, რომ სიმართლე სამართლებრივად დადგინდება, მაგრამ საქართველოში არსებული კლინიკები დღეს ნამდვილად არიან მზად ამ პანდემიის დასამარცხებლად. ჩატარებულია ყველა სახის ტრეინინგები, უმკაცრესად არის ინსპექტირებული მომსახურეობის განხორციელების სანებართვო პირობები, კოორდინირებულია მუშაობა კლინიკებსა და სამინისტროს შორის. ასევე, ეტაპობრივად ვითვისებთ იმ სიახლეებსაც, რასაც გვაწვდიან საერთაშორისო ჯანდაცვის ორგანიზაციები ამ და სხვა ავადობების პრევენცია-დამარცხებისათვის. ვაგრძელებთ ვაქცინაციას მოსალოდნელ რისკებთან ერთად, უკეთესი მომავლისათვის“ - აღნიშნულია კლინიკის ადმინისტრაციის განცხადებაში.

27 წლის ექთანს მძიმე გვერდითი რეაქცია განუვითარდა და 19 მარტს გარდაიცვალა. ის 18 მარტს თბილისში, პირველ საუნივერსიტეტო კლინიკაში გადმოიყვანეს. ახალციხის კლინიკაში მომხდარ შემთხვევასთან დაკავშირებით ჯანდაცვის სამინისტროში შეხვედრა გაიმართა, სადაც ჯანდაცვის ექსპერტები, დარგის სპეციალისტები და გვერდითი მოვლენების მართვის კომიტეტის წარმომადგენლები ვაქცინაციის დროებით შეჩერებასთან დაკავშირებით მსჯელობდნენ. მოგვიანებით, ჯანდაცვის მინისტრმა, ეკატერინე ტიკარაძემ განაცხადა, რომ საქართველოში „ასტრაზენეკათი“ ვაქცინაცია გაგრძელდება.

საქართველოში კორონავირუსის საწინააღმდეგო ვაქცინაცია 2021 წლის 15 მარტიდან დაიწყო.