თამარ გაბუნია: კვირის ბოლომდე კიდევ დაემატება ვაქცინაციის ცენტრები

ჩვენთვის სასურველი ვაქცინაციის მაჩვენებელი დღევანდელ ეტაპზე უნდა იყოს სულ მცირე 3 ათასი მოქალაქის აცრა და შემდეგ ამის გაზრდა 5-10 ათასამდე, როცა უკვე გადავალთ სექტემბრიდან ფართომასშტაბიან ვაქცინაციაზე, - ამის შესახებ თამარ გაბუნიამ ჯანდაცვის სამინისტროში გამართულ ბრიფინგზე განაცხადა. ჯანდაცვის მინისტრის მოადგილის თქმით, კვირის ბოლომდე ვაქცინაციის ცენტრების რაოდენობის გაზრდა იგეგმება.

„მიმდინარე პერიოდში კარგია ის, რომ „სინოფარმზე“ აქტიურობა არის მაღალი. ჩვენ ვგეგმავთ, რომ დავამატოთ ვაქცინაციის ცენტრები, რადგან რაც აქამდე გამოვყავით, განსაკუთრებით დიდ ქალაქებში, სრულად არის შევსებული. ამ კვირის ბოლომდე კიდევ დაემატება ვაქცინაციის ცენტრები და შევუწყობთ ხელს ესენციურ სერვისებში დასაქმებულ მოქალაქეებს, იმისთვის, რომ მათ პრიორიტეტულად ჩაიტარონ ვაქცინაცია. ეს არის პოლიცია, ასევე პედაგოგები, ტურიზმის სფერო და საზოგადოებრივ ტრანსპორტში დასაქმებული პირები“, - განმარტა გაბუნიამ.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 4 მაისს ქვეყანაში ჩინური „სინოფარმით“ ვაქცინაცია დაიწყო.