ხვალიდან, თბილისში, იმ დაწესებულებების ექიმები, სადაც ვაქცინაცია ტარდება, წინასწარი რეგისტრაციის გარეშე შეძლებენ აცრას

თბილისში, იმ დაწესებულებების ექიმები, სადაც ვაქცინაცია ტარდება, შეძლებენ, წინასწარი რეგისტრაციის გარეშე აიცრან, - ამის შესახებ იმუნიზაციის მრჩეველთა ეროვნული ტექნიკური ჯგუფის ხელმძღვანელმა, ივანე ჩხაიძემ იმუნიზაციის საბჭოს სხდომის შემდეგ გამართულ ბრიფინგზე განაცხადა.

მისივე განმარტებით, ცვლილება, ამ ეტაპზე, მოქალაქეთა სხვა კატეგორიას არ ეხება და ხვალიდან, მხოლოდ დედაქალაქში და მხოლოდ იმ დაწესებულებების პერსონალი შეძლებს ამ შეღავათით სარგებლობას, სადაც იმუნიზაციაა შესაძლებელი.

„პირველ რიგში, აქცენტი კეთდება თბილისსა და იმ სამედიცინო დაწესებულებებზე, სადაც ექიმები და სამედიცინო პერსონალია რეგისტრაციის გარეშე დარჩენილი. თბილისში, სამედიცინო დაწესებულებები, სადაც არის არარეგისტრირებული პერსონალი, მათთვის ეს იქნება ღია. ანუ, პირველ რიგში, ეს შეეხება თბილისს და არ იქნება ისე, რომ ხვალიდან, ყველა შეძლებს, მივიდეს და ჩაიტაროს ვაქცინაცია. საუბარია თბილისში, სტაციონარულ სამედიცინო დაწესებულებებზე, სადაც „ფაიზერით“ ვაქცინაცია ტარდება. იმ ექიმებს, რომლებიც ვერ დარეგისტრირდნენ, ან დარეგისტრირდნენ მოგვიანებით, აგვისტოს პერიოდში, შეეძლებათ, ხვალვე მივიდნენ და წინასწარი რეგისტრაციის გარეშე, კლინიკებში, სადაც ვაქცინაცია ტარდება, ჩაიტარონ ვაქცინაცია“, - აღნიშნა ივანე ჩხაიძემ.

26 ივლისს, მთელი ქვეყნის მასშტაბით, 37 ამცრელ პუნქტში, „ფაიზერით“ ვაქცინაცია დაიწყო. მობილიზებულია დამატებითი, ამცრელი ბრიგადები. ვაქცინის დოზები აქტიურად ნაწილდება რეგიონებშიც. იმ უბნებში, სადაც „ფაიზერით“ ვაქცინაციის ადგილები შეივსო, მოთხოვნის შესაბამისად, დამატებითი დოზები მობილიზდება.

ამ ვაქცინით იმუნიზაცია 16 წლის და ზემოთ ასაკის პირებისთვისაა შესაძლებელი. ვაქცინაციისთის ვიზიტის დაჯავშნა შესაძლებელია ამ ელექტრონულ პორტალზე.

24 ივლისს, ამერიკის მთავრობისა და უშუალოდ პრეზიდენტ ჯო ბაიდენის გადაწყვეტილებით, საქართველოში საჩუქრად გადმოცემული „ფაიზერის“ ვაქცინის 500 ათასი დოზა შემოვიდა. ამასთან, ლიეტუვამ საქართველოს „ასტრაზენეკას“ 15 ათასი დოზა აჩუქა. „ფაიზერზე“ რეგისტრაციისთვის, პორტალი 24 ივლისს, 12:00 საათზე გაიხსნა.

ამ დროისთვის საქართველოში კორონავირუსის 416 338 შემთხვევაა დადასტურებული. მათ შორის გამოჯანმრთელდა 381 246, გარდაიცვალა 5 793 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.