ეკატერინე ტიკარაძე: ქვეყანაში ლეტალობის მაჩვენებელი მნიშვნელოვნად იკლებს და ვაქცინაცია გააქტიურებულია

მნიშვნელოვანია, რომ ქვეყანაში ლეტალობის მაჩვენებელი მნიშვნელოვნად იკლებს და ვაქცინაციის პროცესი გააქტიურებულია, - ამის შესახებ ჯანდაცვის მინისტრმა, ეკატერინე ტიკარაძემ ვაქცინაციის საბჭოს სხდომის დასრულების შემდეგ განაცხადა.

მისი თქმით, ზეწოლა ჰოსპიტალურ სექტორზე შემსუბუქებულია.

„დღეს გვაქვს 2 571 შემთხვევა. მნიშვნელოვანია, რომ უკვე გამოჯანმრთელებულების რაოდენობა უსწრებს ინფიცირებულთა რაოდენობას და აქტიური შემთხვევების ჯამური რაოდენობა 35 000 გვაქვს. მნიშვნელოვნად არის შემსუბუქებული ზეწოლა ჰოსპიტალურ სექტორზე, თუმცა რა თქმა უნდა, პაციენტები ჯერჯერობით ჰოსპიტლებში მკურნალობას ინტენსიურად გადიან. დღესდღეობით რეანიმაციულ საწოლზე გვყავს 380 ადამიანი, 1 500 ადამიანია ინტენსიური მოვლის საწოლზე. ასევე მნიშვნელოვანია, რომ ქვეყანაში ლეტალობის მაჩვენებელი მნიშვნელოვნად იკლებს და ვაქცინაციის პროცესი გააქტიურებულია.

ვაქცინების პირველად დოზებზე რეგისტრაცია იკლებს და მნიშვნელოვანია, კიდევ ერთხელ მოვუწოდოთ ჩვენს მოქალაქეებს, რომ ვაქცინა გვიცავს, გვიცავს მნიშვნელოვანი გართულებებისგან, ლეტალობისგან და მნიშვნელოვანია, რომ ვაქცინაციაში უფრო აქტიურად ჩაერთონ“, - განაცხადა მინისტრმა.