გლობალური კვლევის თანახმად, პირბადის ტარება კორონავირუსის გავრცელებას 53%-ით ამცირებს

პირბადის ტარება კორონავირუსის წინააღმდეგ საბრძოლველად საზოგადოებრივი ჯანდაცვის ერთ-ერთი ყველაზე ეფექტური ზომაა, რომელიც დაავადების გავრცელებას 53%-ით ამცირებს. აღნიშნულს გლობალურ დონეზე ჩატარებული კვლევა ცხადყოფს.

ვაქცინები უსაფრთხო და ეფექტურია და მთელ მსოფლიოში სიცოცხლის გადარჩენას უწყობს ხელს, თუმცა ვაქცინების უმეტესობა 100%-იან დაცვას არ უზრუნველყოფს, ხოლო ქვეყნების უმეტესობაში ყველა ადამიანი აცრილი არ არის და ჯერ უცნობია, შეუშლის თუ არა ხელს ვაქცინა კორონავირუსის ახალი ვარიანტების შემდგომ გავრცელებას.

გლობალურ დონეზე, კორონავირუსის შემთხვევებმა 250 მილიონს გადააჭარბა. ვირუსის გავრცელების შედეგად, მსოფლიოში ყოველ 90 დღეში 50 მილიონი ადამიანი ინფიცირდება, ხოლო ათასობით ადამიანი ყოველდღე კვდება.

არაფარმაცევტული ჩარევის სისტემატიურმა მიმოხილვამ და მეტა-ანალიზმა პირველად დაადგინა, რომ პირბადის ტარება, სოციალური დისტანცირება და ხელების ჰიგიენა ეფექტური ზომებია ახალი შემთხვევების შესაჩერებლად, ხოლო პირბადის ტარება ყველაზე ეფექტური ზომაა.

„სისტემატური მიმოხილვა და მეტა-ანალიზი აჩვენებს, რომ პერსონალური და სოციალური დაცვის რამდენიმე ზომა, მათ შორის ხელების ჰიგიენა, პირბადის ტარება და ფიზიკური დისტანცირება Covid-19-ის სიხშირის შემცირებასთან არიას დაკავშირებული“, - წერენ მკვლევრები სამედიცინო ჟურნალ The British Medical Journal-ში გამოქვეყნებულ სტატიაში.

მკვლევრების თქმით, კვლევის შედეგები ხაზს უსვამს ვაქცინის პროგრამებთან ერთად პირბადის ტარების, სოციალური დისტანცირებისა და ხელების ჰიგიენის გაგრძელების აუცილებლობას.

მონაშის უნივერსიტეტისა და ედინბურგის უნივერსიტეტის მკვლევრები აცხადებენ, რომ მრავალმხრივი ზომები, როგორიცაა საზღვრების, სკოლებისა და სამუშაო ადგილების ჩაკეტვა და დახურვა, დამატებით ანალიზს საჭიროებს მოსახლეობაზე მათი პოტენციური უარყოფითი გავლენის შესაფასებლად.

მკვლევრებმა მთელი მსოფლიოდან 30-ზე მეტი კვლევის შედეგები დეტალურად გააანალიზეს. კვლევის შედეგები ცხადყოფს, რომ პირბადის ტარების შემთხვევაში, კორონავირუსის დაავადების გავრცელება 53%-ით მცირდება, ხოლო ფიზიკური დისტანცირებისას - 25%-ით.