ლია გოლიაძე: ხშირია პერსონალის ინფიცირების შემთხვევები, რაც სერიოზულ პრობლემებს შეუქმნის მთელ სამედიცინო სექტორს

სავარაუდოდ, კიდევ მოიმატებს [ინფიცირების შემთხვევები], იმიტომ რომ „ომიკრონი“ არის ძალიან გადამდები შტამი და ამიტომ, რაოდენობა გვექნება ბევრი, - ამის შესახებ ლია გოლიაძემ განაცხადა. ბოჭორიშვილის კლინიკის ინფექციური დეპარტამენტის ხელმძღვანელი აღნიშნავს, რომ შესაძლოა სამედიცინო სექტორი სერიოზული პრობლემის წინ დადგეს, რადგან ხშირია მედპერსონალის ინფიცირების შემთხვევები.

„ერთი პლუსი აქვს, რომ შედარებით მსუბუქად მიდის დაავადების მწვავე პერიოდში, თუმცა პოსტკოვიდი არსად წასულა, იგივე გართულებები რჩება „ომიკრონის“ გადატანის შემდგომ, რაც ზოგადად სხვა კორონავირუსულ ინფექციებსაც ახასიათებს. ხშირი არის პერსონალის ინფიცირების შემთხვევები, რაც სერიოზულ პრობლემებს შეუქმნის მთელ სამედიცინო სექტორს. ჯერჯერობით ავუდივართ, მაგრამ თუ ასე გაგრძელდა და ყველა დაინფიცირდა, არ ვიცი რა იქნება, იმიტომ რომ მუშახელი აღარ დაგვრჩება რეალურად“, - განაცხადა გოლიაძემ.

ამ დროისთვის საქართველოში კორონავირუსის 1 075 154 შემთხვევაა დადასტურებული. მათ შორის გამოჯანმრთელდა 972 745, გარდაიცვალა 14 774 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.